La nova lescha saja pli faira, portia damain birocrazia e taxas pli bassas per tuts, ha ditg Cusseglier naziunal Martin Candinas. La revisiun da la lescha saja urgenta, cunquai che la lescha saja antiquada. Oz pajan mo quels che possedian in radio u ina televisiun ina contribuziun. Mintga telefonin e laptop saja dentant er in radio u ina televisiun.
Ils sincers pajan per tschels
Cun la nova lescha stuessan praticamain tut ils tegnairchasas ed interpresas pajar taxas da radio e televisiun. Il 2012 hajan dentant be 4,8% da las interpresas pajà. Ed era tar ils tegnair chasas na pajan betg tuts che stuessan. «Ils sincers pajan per ils quals che consumeschian nair», ha Candinas dà ponderar.
Midada dal sistem
La nova lescha preveda ina midada dal sistem: Da nov na stuess ins betg pli pajar ina taxa sch’ins posseda in apart – pia per exempel ina televisiun u in radio – mabain mintga tegnairchasa ed interpresa stuess alura pajar ina taxa. Quai avess per consequenza che la taxa per radio e televisiun sa sbassass alura tenor il Cussegl federal da 462 sin bundant 400 francs.
Ed era la gronda part da las interpresas na fissan betg pertutgadas dal midament. Bundant 75% da las interpresas na stuessan betg pajar las taxas damai ch’ellas han svieutas pli pitschnas che ina mesa milliun francs ad onn. Ulteriurs 9% da las interpresas stuessan pajar damain che anc oz.
Nagin tadlar e mirar nair pli
«En l’avegnir na vegn quai betg pli a dar da quels che guardan u taidlan nair», uschia Candinas. La nova lescha procuria per gistadad. E vitiers vegnia ch’ils emetturs locals e regiunals privats vegnian era rinforzads e cunquai era la diversitad.