Siglir tar il cuntegn
cuntegn

Svizra ORF sut squitsch: FPÖ smanatscha a schurnalists «betg corrects»

En l'Austria ha la dispita tranter la partida da dretga FPÖ e la chasa da medias da dretg public l’ORF cuntanschì in nov stgalim d'escalaziun, scrivan las agenturas da novitads SDA e DPA.

Um da camera cun camera.
Legenda: L'ORF è il portal da novitads pli popular en Austria – la chasa da medias ha 4 emitturs da tv, 12 da radio e la pagina orf.at. Keystone

Il politicher da la FPÖ, Norbert Steger – ch'è commember dal cussegl da fundaziun da l'ORF – ha ditg envers la gasetta Salzburger Nachrichten ch'ins veglia stritgar in terz dals correspundents da l'exteriur, «sche quels na sa cumportian betg correctamain».

L'emprim admonir – suenter relaschar

Sco exempel ha el numnà il correspundent da l'ORF en l'Ungaria. Sia rapportaziun da l'elecziun en l'Ungaria saja stada «unilaterala», crititga Steger.

Vinavant admonescha el ils schurnalists da l’ORF a reguard il diever da medias socialas: Tgi che cuntrafetschia a las novas reglas planisadas per il cumportament en las medias socialas «vegn admonì l’emprim – e suenter relaschà». Quellas reglas duajan definir, tge ch’ils schurnalists dastgan publitgar per exempel sin Facebook u Twitter.

La cumposiziun dal gremi suprem da l’ORF vegn fatga dapi ina refurma avant 17 onns per gronda part da la regenza. Steger è er en discurs sco nov suprastant dal cussegl da fundaziun da l’ORF.

Schef da l’ORF defenda sia glieud

Alexander Wrabetz, il schef da l’ORF, defenda sia glieud sin Twitter. El annunzia dad avair prolungà il contract da lavur dal correspundent crititgà da Norbert Steger e lauda la lavur dals correspundents:

Wrabetz sustegna il correspundent crititgà ...

... e lauda la spierta dals correspundents en summa

En ina communicaziun refusescha Wrabetz enpli l'idea da Norbert Steger, da destabilisar la rait da correspundents da l'ORF, «decisamain». La rapportaziun dals correspundents e las correspundentas haja da vegnir fatga «exclusivmain tenor criteris schurnalistics en l'interess dal public».

ORF sut squitsch

L'ORF sco chasa da medias independenta e pli gronda en Austria vegn crititgà dapi mais – e quai en emprima lingia da la nova regenza, che vul «refurmar» l'ORF da fund ensi. Tenor experts da medias duaja quai capitar en emprima lingia cun substituir las persunas al timun cun persunas ch'han la medema colur politica sco la regenza.

Premi Grimme per Armin Wolf

  portrait Wolf.
Legenda:Keystone

L'ultim schurnalist da l'ORF ch'era vegnì en la mira da la FPÖ è il star moderatur Armin Wolf. El ha survegnì il venderdi saira en Germania in'undraziun speziala – numnadamain il premi Grimme da televisiun. Wolf era vegnì offendì dal vicechancelier austriac Heinz-Christian Strache (FPÖ) via Facebook. Wolf e Strache eran sa cunvegnids suenter vivas debattas senza agid giuridic. Strache aveva da sa stgisar cun in inserat da gasetta e sin ses conto da Facebook.

Sco gia en Svizra vegn uschia er in Austria il squitsch sin l’emettur da dretg public da vart dretga dal spectrum politic. Fertant ch’il service public medial è vegnì rinforzà en Svizra tras in ferm «na a no-Billag» da la populaziun a l’urna, n’è la situaziun en auters pajais sco en Austria e Germania betg uschia clera.

RR novitads 14:00