Ordinaziun federala dals pretschs da medicaments vegn adattada

Ina sentenzia dal Tribunal federal ha uss sco consequenza che l’ordinaziun federala davart ils pretschs da medicaments sto vegnir adattada, quai communitgescha il Cussegl federal. Da nov duai er vegnir giuditgà tenor ina bilantscha dal niz e dals custs.

Medicaments sin in regal.

Legenda da maletgs: Ils pretschs da medicaments vegnan periodicamain giuditgads. Keystone

Enfin uss vegnivan ils pretschs dals medicaments renconuschids da las cassas da malsauns sulet giuditgads en ina cumparegliaziun cun ils pretschs en l’exteriur. Uschia eran differents pretschs per medicaments vegnids sbassads. Quai era tar radund 1’500 medicaments il cas. Las mesiras aveva purtà respargns da radund 600 milliuns francs, communitgescha il Cussegl federal.

Singulas interpresas da farma aveva fatg recurs cunter la reducziun dals pretschs tras il departament federal per la sanadad. En ina sentenzia dal Tribunal federal il december 2015 aveva quel decis ch’ina giudicaziun dals pretschs sulet cun ina cumparegliaziun cun ils pretschs da medicaments en l’exteriur na saja betg lubida.

Tenor il Tribunal federala sto uss ils pretschs da medicaments er vegnir giuditgads tenor ina bilantscha dal niz e dals custs e quai cun medicaments da la medema indicaziun cun sumegliant niz. Ultra da quai ston ils criteris da la rentabilitad e dal effect sco er da l’opportunitad vegnir controllads periodicamain. Il Cussegl federal ha decis da far controllas periodicas sur dals pretschs da medicaments tenor las ordinaziuns novas a partir da 2017.

Per generica duai dar a partir dal 2019 in sistem da pretschs da referenza. Il Cussegl federal ha incumbensà il departament federal da l'intern d'elavurar mesiras correspundentas.

RR novitads 14:00