Valaivla è la vignetta a partir da l'emprim da december 2017 enfin la fin schaner 2019 ed ins survegn ella tranter auter tar tancadis, garaschas, al spurtegl da la posta sco era tar l'uffizi da traffic u posts da duana.
L'administraziun da duana fa attent dad allontanar vignettas scrudadas. Quai betg per che la vignetta oransch-metallica haja dapli effect, mabain per ch'ils manischunzs possian vesair meglier. Impurtant èsi era da montar ella senza diever d'ulteriurs materials. E la vignetta vala mo per in singul vehichel.
600 enfin 700 cas da vignettas sfalsifitgadas ad onn
Mez october han ins constatà che passa in mez milliun fa diever da las autostradas senza vignetta ni cun ina vignetta manipulada. Uschia van a perder a la Confederaziun bunamain 20 milliuns francs ad onn. Las mesiras èn las suandantas: Quels che charreschan senza vignetta, spetga in chasti da 200 francs e quels che fan diever d'ina vignetta sfalsifitgada ni sfalsifitgeschan ina vignetta ston quintar cun ina privaziun da la libertad per enfin trais onns. Tenor l'Uffizi federal per giustia datti mintg'onn 600 enfin 700 cas da vignettas sfalsifitgadas.
Per distgargiar la Procura publica federala (PPF) n'èn ils delicts da vignetta betg pli en lur responsabladad. Cun il cumenzament da la vignetta oransch-metallica è quai chaussa da la Polizia chantunala.
RR novitads 15:00