Siglir tar il cuntegn

Svizra «Operaziun 4. persuna»: A la tschertga da candidats selvadis

3 dis avant las elecziuns dal Cussegl federal schlargian las medias la selecziun da la PPS cun candidats selvadis.

Tenor la gasetta «NZZ am Sonntag» tschertga la Partida socialdemocratica Svizra (PS) ferventamain in candidat selvadi ord las retschas da la PPS. Numnada vegn cunzunt la cussegliera guvernativa dal Schaffusa, Rosmarie Widmer Gysel.

Quai è uschè u uschia ipotetic. Ed jau na stess betg a disposiziun per l'elecziun
Autur: Rosmarie Widmer GyselCussegliera guvernativa, Schaffusa

Entant ha la cussegliera guvernativa Rosmarie Widmer Gysel prendì posiziun vers Radio SRF. Ins possia bain discurrer ipoteticamain d'ina candidatura. Quai na vegnia però betg a capitar. Ella na stettia betg a disposiziun per l'elecziun.

Hurter e Germann vegnan era lantschads da las medias

Era tenor la «SonntagsZeitung» ha cumenzà «l'operaziun da la quarta persuna». Sco candidats pussibels numna ella il cusseglier naziunal da la PPS Schaffusa, Thomas Hurter ed il cusseglier dals chantuns, Hannes Germann.
La successura u il successur da la cussegliera federala Eveline Widmer-Schlumpf vegn elegì mesemna proxima.

Candidaturas per ina reelecziun:

  • Doris Leuthard (PCD), departament da traffic, energia e communicaziun
    cussegliera federala dapi 14.06.2006.
  • Ueli Maurer (PPS), departament da defensiun, protecziun dal pievel e sport
    cusseglier federal dapi 10.12.2008
  • Didier Burkhalter (PLD), departament da l'exteriur
    cusseglier federal dapi 16.09.2009
  • Simonetta Sommaruga (PS), departament da giustia e polizia
    cussegliera federala dapi 22.09.2010
  • Johann Schneider-Ammann (PLD), departament d'economia, furmaziun e perscrutaziun
    cusseglier federal dapi 22.09.2010
  • Alain Berset (PS), departament da l'intern
    cusseglier federal dapi 14.12.2011

Suenter che la cussegliera federala Eveline Widmer-Schlumpf (PBD) ha declerà da betg candidar per in'ulteriura perioda d'uffizi, ha l'Assamblea federala d'eleger mesemna almain 1 nova persuna en il Cussegl federal.

Sin il tichet uffizial da la PPS

La fracziun federala da la Partida populara Svizra (PPS) ha decidì las suandontas persuna che candideschan uffizialmain per il sez vacant.

  • Thomas Aeschi (PPS Zug)
    cusseglier naziunal dapi 05.12.2011
  • Guy Parmelin (PPS Vad)
    cusseglier naziunal dapi 01.12.2003
  • Norman Gobbi (PPS Tessin)
    cusseglier naziunal dal 01.03.2010-14.04.2011 (lura per la Lega dei Ticinesi)

RR novitads 14:00

Elecziun Cussegl federal 2015

Elecziun Cussegl federal 2015

Dapli dal Cussegl federal, da l'Assamblea federala e da candidaturas chattais en la survista.