Il Cussegl federal ha decidì da metter a disposiziun ils meds per pudair stgaffir 86 ulteriurs plazzas en il cumbat cunter il terrorissem. Las plazzas novas duain vegnir repartidas suandantamain:
- 23 plazzas tar Servetsch federal d'infurmaziuns (NDB)
- 24 plazzas tar l'Uffizi federal da polizia (fedpol)
- 28 plazzas tar il Corp da guardias da cunfin (Cgcf)
- 3 plazzas tar il Departament federal d'affars exteriurs
- 8 plazzas tar il Secretariat da stadi per l'immigraziun
Las plazzas tar il Corp da las guardias da cunfin n'èn betg limitadas temporarmain. I sa tractia qua d’in augment gia decidì ed oriundamain previs per l’onn 2017.
Betg dapli controllas al cunfin
Cun questas mesiras vul la Cussegl federal tegnair quint al svilup dals ultims mais. Tenor il Servetsch federal d'infurmaziuns è il privel d'attatgas terroristicas en Svizra s'augmentà en consequenza da las attatgas da Paris ils 13 da november.
Dentant è il Cussegl federal da l'avis che las controllas da cunfin na stoppian betg vegnir intensivadas. Las mesiras existentas dal Corp da guardias tanschian.
Smanatscha terroristica è creschida
Il privel d’attatgas terroristicas saja s’augmentada gia l’entschatta da november, avant las attatgas a Paris, ha ditg il directur dal Servetsch federal d'infurmaziuns (NDB), Markus Seiler. Gia lura duai il NDB gia avair gì indizis ch’il Stadi Islamic (SI) «duai avair tramess persunas en l’Europa, per planisar attatgas u da far talas.» Ina colliaziun directa cun la Svizra na dettia quai betg fin ussa. Sch’i dettia ina «smanatscha terroristica concreta» en il conturn da Genevra, stoppian las inquisiziun mussas.
Svizra nagina mira prioritara dal SI
Il Cusseglier federal, Ueli Maurer ha dentant fatg attent, ch’ins saja conscient da la «situaziun delicata» a Genevra: «La citad è ina carta da visita.» La Svizra na saja dentant «nagina mira prioritara» da la milissa da terrur Stadi Islamic.
Tenor il Cussegl federal datti il mument 70 inquisiziuns cunter «sustegniders probabels da l’organisaziun terroristica.» En 33 cas saja vegnì instradà ina procedura penala.
RR novitads 17:00