L’october ha purschì temperaturas da stad cun 20 e dapli grads. El ha envidà d’ir ordadora per viandar, spassegiar e giudair la natira. In mais da record n’è l’october dentant betg, di Thomas Kleiber dad SRF Meteo. Sch’il mais fiss a fin vegniss el sin il pli sin la plazza quatter. Il pli chaud october saja stà quel da l’onn 2006.
I vegn pli fraid
Sch’il stgaudament dal clima ha gì influenza sin quest mais n'è betg cler. Per dir quai stuess ins cumparegliar tozzels octobers. Ed insumma, il mais n'è anc betg finì, el vegn pli frestgs. Il cunfin da naiv sa sbassa la dumengia sin 1’100 meters ed i vegn radund 10 grads pli frestg.
Munta in bel october in enviern criv?
Ina regla da purs di, sche l’october è chaud e bel lura datti in enviern criv. Il meteorolog Thomas Kleiber è sceptic. Quellas reglas na constettian savens betg. Ins na sappia betg dir sch’i dettia paca u massa naiv, in enviern fraid u plitost chaud. Uschia resti nagut auter che da giudair ils davos dis chauds, avant ch’i vegn fraid. Il rest è ina surpraisa.
La Viafier retica ha profità da l'october d'aur
Ils 11 d'october ha ella rinforzà ils trens cun dapli vaguns. A partir dals 13 d'october eran tut ils vaguns en acziun. Las lingias dal Bernina e da l'Albula èn stadas frequentadas il pli fitg, ha ditg la Viafier retica sin dumonda dad RTR. Il di da record è stà ils 15 d'october. 2'500 persunas èn vegnidas transportadas entaifer duas uras da l'Engiadina a Cuira u Landquart. Tanta glieud datti uschiglio mo il favrer. In tren ha transportà 515 persunas da San Murezzan a Cuira, quai è record da l'onn. Normalmain ha quai tren capacitads per 300 persunas.
Sin il Calanda...
Er en la regiun da Cuira han blers nezzegià ina da las ultimas schanzas per viagair sin il Calanda. Sin il culm sa senti ins pli libers, la vista ch'ins haja l'atun saja simplamain fantastica e las colurs bellezia. Uschia las viandantas ed ils viandants. Quai fetschia or da l'atun lur stagiun favurita.
RR actualitad 17:00