Occultist e betg terrorist, din autoritads da Turitg

L'um svizzer da 24 onns che ha sajettà enturn il glindesdi en in center islamic a Turitg, è era responsabel per in mazzament. Tenor la polizia han examinaziuns da DNA mussà che l'um ha mazzà la fin d'emna in auter um a Schwamendingen. Il delinquent era interessà vid occultissem.

Sco la polizia da Turitg ha infurmà tar ina conferenza da medias, enconuscheva il delinquent l'unfrenda da la dumengia gia dapi l'uffanza, els eran circa tuttina vegls. Il davos temp haja dentant dà differenzas tranter ils dus umens. L'unfrenda da Schwamendingen era in Svizzer cun ragischs sidamericanas. La dumengia passada aveva in passant chattà quest um mort sin ina plazza da giugar a Schwamendingen.

Il glindesdi saira ha l'um da 24 onns sajettà en in Center islamic a Turitg. Trais persunas en la en la vegliadetgna da 30, 35 e 56 onns eran vegnidas blessadas, per part grevamain. Suenter era il delinquent fugì. Intginas uras suenter l'attatga ha la polizia chattà la bara da l'um a la Gessnerallee, be paucs tschients meters dasper la moschea.

Ina via bloccada da la polizia

Legenda da maletgs: La polizia ha bloccà la Eis-Gasse a Turitg suenter il sajettim en il center islamic. Keystone

Nagin avis sin act da terror

Il Svizzer cun ragischs en il Ghana abitava en la regiun da Uster, ed el era gia enconuschent a la polizia. Avant set onns era el vegnì registrà pervi d'avair engulà in velo. Perquai aveva la polizia in'acta sur da l'um. Avis sin in motiv terroristic dals dus acts da violenza n'ha la poliza da Turitg betg. Davart contacts cun il center islamic na sa la polizia nagut.

Um possedeva pliras armas

Tenor la polizia n'aveva il Svizzer da 24 onns nagins problems psichics. L'arma ch'el ha duvrà per sajettar enturn en il center islamic e pli tard far suicidi, ha l'um cumprà uffizialmain. En l'abitaziun ha la polizia era chattà cuntels.

Unfrendas ord privel da vita

Las unfrendas da la sajettada da glindesdi saira amez Turitg èn entant ord privel da vita. Ils dus umens grev blessads sajan uss en in stadi stabil, ha declerà la polizia da Turitg.

RR novitads 10:00++