Siglir tar il cuntegn
cuntegn

Svizra Oberwil-Lieli: «nursa naira» tranter vischnancas en l'Argovia?

La vischnanca Oberwil-Lieli en l’Argovia na vul betg prender si ils diesch requirents d’asil repartids dal chantun. Ils votants han decis cunter l’obligaziun da prender si migrants ed enstagl da pajar 290’000 francs. La cussegliera guvernativa responsabla discurra d'ina «nursa naira».

La votaziun ad Oberwil-Lieli ha mussà: Il vitg è dividì davart la politica d'asil.
Legenda: La votaziun ad Oberwil-Lieli ha mussà: Il vitg è dividì davart la politica d'asil. Keystone

Il suveran d’Oberwil-Lieli ha concret refusà il budget da vischnanca 2016 en ina votaziun da referendum. La decisiun è però stada stretga cun 579 ch’han ditg na e 525 gea.

Annullà decisiun dal november

Cun il na al budget han las votantas ed ils votants bittà enturn la decisiun da la radunanza communala da la fin da november. Lura aveva la radunanza decis da betg duvrar ils 290’000 francs per cumpensar la recepziun da requirents d’asil.

La decisiun n’è anc betg definitiva. Il cussegl da vischnanca sto il zercladur preschentar in nov budget a la radunanza communala.

Oberwil-Lieli: in singul cas

Suenter la decisiun d’Oberwil-Lieli prenda uss posiziun la cussegliera guvernativa Susanne Hochuli. Hochuli ha ditg envers radio SRF che Oberwil-Lieli saja in'excepziun en il chantun Argovia.

I saja fauss da concluder dad ina «nursa naira» sin ina muntanera da nursas nairas. Las vischnancas che na vulan betg prender si requirents d'asil ston pajar ina pauschala per di e requirent d'asil. A l'entschatta da l'onn ha il chantun augmentà quest import da 10 sin 100 francs.

RR novitads 09:00