Siglir tar il cuntegn
Inhalt

Svizra «Nus na dastgain betg capitular»

La transparenza saja la clav per la autodeterminaziun e lezza stoppia vegnir protegida cun tut ils meds pussaivels di Adrian Lobsiger, l’ incumbensà federal per la protecziun da datas. I na saja mai memia tard d’intervegnir era betg encunter concerns gronds che ramassan nossas datas.

Legende: Audio L’ incumbensà federal per la protecziun da datas e per la transparenza, Adrian Lobsiger vul proteger pli fitg nossas datas en l’internet. abspielen. Laufzeit 02:53 Minuten.
02:53 min, Actualitad dals 26.06.2017.

Impurtant saja che mintgina e mintgin saja conscient a tge ch’ins di la finala gea e tge cundiziuns generalas da fatschenta ch’ins suttascriva. Ina gronda part da las utilisadras ed utilisaders chargian per exempel giu ina app e na legian betg tras las cundiziuns.

Quai saja però era chapibel di Adrian Lobsiger, quellas cundiziuns èn savens pli gronds texts, scrit pitschen e betg survesaivels. E precis là vul uss Lobsiger agir.

Adrian Lobsiger, incumbensà federal per la protecziun da datas e transparenza
Legenda: Adrian Lobsiger, incumbensà federal per la protecziun da datas e transparenza Keystone
Mo sche jau sai a tge ch'jau ditg gea – alura poss jau decider tgi che survegn mias datas e tge ch’ins po far cun quellas.
Autur: Adrian Lobsigerincumbensà federal per la protecziun da datas e transparenza

La surfatscha d’installaziun dal program ni da l’app duai esser survesaivla. Era duai esser scrit il text en pleds simpels, uschè pon ins sez svelt decider sur da las datas ch’ins vul dar liber ni tgeninas betg. Impurtant saja era che las utilisadras ed ils utilisaders possian adina puspè adattar las opziuns. Enavant duain ins era survegnir mo curts texts ch’en relevants tar l’opziun e betg tut las cundiziuns da fatschenta en ina.

I n'è mai memia tard per proteger nossas datas!
Autur: Adrian Lobsigerincumbensà federal per la protecziun da datas e transparenza

Ins na dastga betg capitular sch’i va per las datas di Adrian Lobsiger. Ed ins na dastga betg laschar starmentar ch’ì saja tut memia cumplitgà e internaziunal uschè ch’ins na possa betg pli agir. Da patratgar uschè saja faus. Ins possia agir e megliurar la situaziun era cunter gronds concerns. In exempel è «Moneyhouse» ina plattafurma che porscha infurmaziuns da firmas e persunas. Dapi l’avrigl na dastga la plattafurma betg pli publitgar infurmaziuns da persunas privatas che n’han betg dà la lubientscha per far quai.

Sco en quest cas, era sche las firmas possedian gia las datas, possian ins evitar che quellas dovran ellas. Perquai betg capitular ha accentuà Lobsiger.

Pli autas taxas per mirar documents uffizials

L'onn passà hai dà pli paucas dumondas per survegnir invista en documents uffizials. Il medem mument èn dentant las taxas per questas dumondas creschidas. Quai resulta dal rapport annual da l'incumbensà federal per la protecziun da datas Adrian Lobsiger.

En tut èn vegnidas inoltradas l’onn passà 550 dumondas da survegnir invista en documents uffizials. En cumparegliaziun cun l’onn passà èn quai 50 dumondas pli pauc. En 303 cas han las autoritads dà la lubientscha totala en tals documents. En 105 dumondas han las autoritads sulet dà ina invista parziala.

Marcant augment da taxas

Las taxas per l'invista èn s'augmentadas sin bunamain 23'000 francs. Il 2015 era quai anc stgars 14'000 francs, il 2014 anc tar 2’600 francs. Quest augment stettia en cuntradicziun cun ina iniziativa parlamentara che pretenda l’access gratuit als documents uffizials, ha ditg Lobsiger. Las taxas èn vegnidas dumandadas das per sulet 13 dals cas. En ils blers dals cas na vegnia quai betg dumandà daners, hai num en il rapport da Lobsiger.

RR novitads 11:00