Siglir tar il cuntegn
cuntegn

Svizra «Nus n'avain betg taschì»

Il minister da l’exteriur Didier Burkhalter sa dosta cunter renfatschas: La situaziun dals dretgs umans en la China na saja betg vegnida sclusa dals discurs.

Didier Burkhalter e Xi Jinping mangian in fondue da chaschiel.
Legenda: Tut plain armonia? Er temas dischagreabels sajan tuttavia vegnids discutads cun Xi Jinping, uschia Burkhalter. Keystone

Il minister da l’exteriur svizzer Didier Burkhalter da dosta cunter las reproschas che la Svizra haja «taschì» davart la situaziun dals dretgs umans en la China. Ils dretgs umans sajan stads in tema, ha el ditg. Concretamain haja la Svizra proponì ch’il cumissari per dretgs umans da l’ONU fetschia ina visita a la China.

Il president chinais Xi Jinping haja sinaquai «reagì positiv», uschia Burkhalter en in’intervista cun las gasettas «Tages-Anzeiger» e «Der Bund».

Burkhalter: Progress economic e social da China meglier ch'areguard dretgs umans

La vart svizra emprovia ina maschaida da laud e critica: «Nus avain ditg ad el ch’i constettia ch’i dettia gronds progress sin ils champs socials ed economics», ha ditg Burkhalter. I saja dentant er vegnì menziunà «che la Svizra saja persvasa ch’i possia er dar progress sin ils champs da la libertad d’exprimer l’opiniun e da las libertads persunalas».

Il cusseglier federal ha plinavant constatà ch’il tema dals dretgs umans possia entant puspè vegnir discutà en il discurs direct. Las consequenzas da l’eclat dal 1999 sajan «uss sclerids». Lezza giada aveva l’anteriur president chinais Jiang Zemin reagì grittentà sin protests da Tibet a Berna. «Ils Chinais san ch’i dat en Svizra ina tenuta constructiva».

RR novitads 06:00