Siglir tar il cuntegn
cuntegn

Svizra Novs jets da cumbat – il pievel duai decider

Il parlament vul ch’il suveran svizzer duai respunder, sche la Svizra cumpra novs jets da cumbat u betg. Il Cussegl dals chantuns segua al Cussegl naziunal e di GEA a la moziun correspundenta da la PBD, scriva l’agentura da novitads SDA.

Jet e persunas che guardan el.
Legenda: Il suveran duai decider, sch'el vul jets da cumbat novs – e l'armada suenter da tgenin tip che quels vegnan ad esser (Maletg: F/A-18 tar show sur Meiringen). Keystone

Cun la decisiun da la gievgia conferman tuttas duas chombras dal parlament lur voluntad, da laschar decider il pievel svizzer davart la dumonda da basa aviuns da cumbat novs GEA u NA. La votaziun in chaussa vegn ad avair lieu la primavaira 2020.

Cun quai ch'il Cussegl dals chantuns ha approvà uss – suenter il Cussegl naziunal – cun 22 a 18 vuschs la moziun correspundenta da la PBD, n'è dentant la via a la votaziun anc betg dil tutta fatg libra.

Cussegl federal vul votaziun dal pievel

Durant che la moziun PBD (2017) era en il process parlamentar aveva er il Cussegl federal communitgà, da vulair laschar decider il pievel da la dumonda jets novs GEA u NA.

Avant che l'armada sa decidia per in jet specific haja il pievel da dir, sch'el vul insumma dar ora otg milliardas per aviuns novs.

Via referendum facultativ a votaziun dal pievel

Per pussibilitar la votaziun vegn a preschentar il Cussegl federal la cumpra da nov jets en furma dad ina decisiun da principi. Quella suttastà al referendum facultativ – e quai pussibilitescha al suveran da ramassar 50'000 suttascripziuns e chaschunar uschia ina votaziun dal pievel.

Actualmain ha gia la Gruppa per ina Svizra senz'armada GSOA annunzià da vulair prender, cun sustegn dals verds, il referendum – e perquai fan las autoritads quint cun ina votaziun dal pievel, er sch'ella n'è facticamain anc betg decidida per propi.

RR novitads 12:00