Siglir tar il cuntegn
Inhalt

Svizra Novs aviuns da cumbat senza referendum

Suenter il debachel cun l’aviun da cumbat Gripen, cusseglia ina gruppa d’experts da la Confederaziun da cumprar in nov aviun d’armada ord il budget d’armada regular. In referendum fiss uschia exclus.

Ina fotografia da l'aviun da cumbat FA/18.
Legenda: L'Armada svizra duess finalmain remplazzar il FA/18. Keystone

Ina gruppa d’experts recumonda a l’Armada svizra da cumprar tranter 20 e 70 novs aviuns da cumbat, sco era d’investir en in nov sistem da defensiun cunter aviuns. Senza quai, savess la Svizra tenor ils experts perder l’abilitad da defender ses spazi d’aria independentamain. La gruppa d’experts è vegnida engaschada dal parsura dal Departament da defensiun Guy Parmelin. Ella propona uss quatter variantas. La pli chara custass radund 14 milliardas francs e la pli bunmartgada 4 milliardas francs.

Finanziaziun anc betg clera

Anc avert èsi co la Confederaziun vul finanziar ils novs aviuns ed il sistem da defensiun cunter aviuns. Medemamain avert resta sch’il pievel ha anc in pled en chaussa u sche las finanziaziuns vegnan fatgas cun il budget ordinari sco quai che la gruppa d’experts recumonda. Cun pajar ils aviun ord il budget d’armada regular, fiss in referendum exclus.

Atgnamain aveva l’armada gia gì planisà da cumprar sin il 2018, 22 aviuns da cumbat cun il num Gripen dal producent svedais Saab. Ils 18 da matg 2014 ha il suveran svizzer refusà a l’urna cun 53,4% la cumpra da quest aviun.

RR novitads 14:00