La cumpra da novs aviuns da cumbat duai succeder a moda transparenta, di la ministra da defensiun Viola Amherd. Decisivs duain esser ils criteris da custs ed utilitad. Ella na possia betg star davos ina decisiun da cumprar in aviun bler pli char u bler pli schlet ch'in auter be or da motivs politics. Quai ha ditg Amherd en ina intervista cun la «Neue Zürcher Zeitung».
Ma sche custs ed utilitad sajan cumparegliabels, lura vegnian er resguardads aspects politics. Il Departament federal da defensiun, protecziun da la populaziun e sport VBS vegnia a far transparent, tge aviun ch'ils experts hajan valità sco il meglier. Decider davart il tip d'aviun che vegn lura cumprà vul il Cussegl federal anc avant las vacanzas da stad. Suenter la decisiun duai er il rapport dals experts – ch'è actualmain en lavur – vegnir publitgà.
