Siglir tar il cuntegn

Header

Petra Gössi da la PLD (san.) e Regula Rytz dals Verds (dre.).
Legenda: Duas dunnas a la testa. Petra Gössi da la PLD (san.) e Regula Rytz dals Verds (dre.). Keystone / Montascha RTR
cuntegn

Svizra Novas presidentas da partida - Gössi (PLD) e Rytz (Verds)

Ina sonda, trais scuntradas politicas en Svizra. La PLD, ils Verds e la PS èn sa scuntradas per lur radunanzas da delegads. Duas midadas a la testa datti, numnadamain cun las novas presidentas Petra Gössi da la PLD e Regula Rytz dals Verds.

Partida liberaldemocratica

Ils delegads da la PLD han elegì la sonda unanimamain ina nova presidenta da lur partida: Petra Gössi. La cussegliera naziunala dal chantun da Sviz succeda a Philipp Müller. En ses pled d’avertura ha ella accentuà l’impurtanza da l’atgna responsabladad.

Petra Gössi.
Legenda: Petra Gössi è la nova presidenta da la Partida liberaldemocratica svizra. Keystone

La libertad e l’atgna responsabladad hajan adina la consequenza ch’ins stoppia bandunar la zona da confort, ha ditg Gössi. «Igl è pli cumadaivel d’adina appellar il stadi.» La PLD saja la suletta partida che defendia il model da success Svizra. Quel vegnia adina pli fitg mess en dumonda da forzas socialisticas e conservativas.

L’elecziun da Gössi (40) è be pli stada ina chaussa formala: Ella era la suletta candidata per il presidi. Il cusseglier naziunal Christian Wasserfallen (BE) ed il cusseglier dals chantuns Hans Wicki (NW) avevan ponderà da candidar, ma eran la finala sa decidids encunter quest pass.

Ils Verds

La cussegliera naziunala dal chantun da Berna Regula Rytz surpiglia il timun dals Verds (Partida ecologia svizra PES). Ils delegads han elegì Rytz (54) cun gronda maioritad a chaschun da lur radunanza a Zofingen AG.

Regula Rytz.
Legenda: Regula Rytz è la nova presidenta dals Verds. Keystone

Be duas vuschs han mancà ad ella per l'unanimitad. Rytz era l'unica candidata per quest post. Dapi il 2012 aveva Rytz manà la partida sco copresidenta ensemen cun la cussegliera naziunala dal chantun Vad Adèle Thorens. Rytz vesa la renovaziun cuntinuanta dals Verds sco gronda sfida.

Sco la presidenta Rytz ha ditg, veglia ella lantschar il project «futur verd». Ins veglia discutar tant sur da la critica da creschientscha e furmas d’economia alternativas sco er sur da la repolitisaziun, l’ecologia e la collavuraziun cun moviments socials.

Partida socialdemocratica

A la radunanza da delegads da la PS a La Chaux-de-Fonds ha la cussegliera federala Simonetta Sommaruga pledà per la nova lescha d'asil.

La cussegliera federala Simonetta Sommaruga.
Legenda: La cussegliera federala Simonetta Sommaruga durant ses pled a La Chaux-de-Fonds. Keystone

Questa revisiun na porta betg mo proceduras pli spertas. Ella megliereschia era la situaziun dals requirents d'asil. Uschia hajan quels da l'entschatta gia ina persuna da contact. Tras quai daventia il nov sistem pli effizient e uman. Ils delegads da la PS sustegnan la nova lescha d'asil.

Ils delegads èn suandads a la recumandaziun da lur cussegliera federala ed han ditg gea al project cun 172 cunter 4 vuschs. Er han els favurisà la parola da gea envers la libertad da votar, quai cun 170 cunter 13 vuschs.

Plinavant han ils Socialdemocrats er prendì posiziun areguard ils ulteriurs projects da votaziun. Ina survista da las posiziuns da la PLD, dals Verds e da la PS chattais vus sutvart en la tabella.

Tge dian las partidas dals projects da votaziun dals 5 da zercladur?


PLD
VerdsPS
Iniziativa «A favur dal servetsch public»
NA
NA
NA
Iniziativa «Per in’entrada da basa nuncundiziunada»
NA
LIBERTAD DA VOTARNA
Iniziativa «Per ina finanziaziun gista dal traffic»
NA
NA
NA
Midada da la Lescha federala davart la reproducziun cun assistenza medicala (LRAM)

GEA
LIBERTAD DA VOTARLIBERTAD DA VOTAR
Midada da la Lescha d’asil (LAsil)

GEA
GEA
GEA

RR novitads 15:00 / 16:00

Artitgels legids il pli savens