Siglir tar il cuntegn
Inhalt

Svizra Novartis avant gronda acquisiziun

Il concern da farma Novartis vul surprender l'interpresa da farma franzosa Advanced Accelerator Aplications ed uschia schlargiar il sectur da fatschenta per cumbatter il cancer.

La chasa principala da Novartis a Basilea.
Legenda: Novartis vul surprender la Advanced Accelerator Applications. Keystone

Il concern da farma Novartis vul cumprar per 3,9 milliuns francs l'interpresa da farma franzosa Advanced Accelerator Applications (AAA), ch'è sa spezialisada sin medischina nucleara. Novartis porscha als acziunaris dad AAA 41 dollars per aczia ubain 82 dollars per in American Depository Share, che correspunda a duas aczias. Las aczias dad AAA vegnan negoziadas a la bursa da tecnologia Nadaq a New York. Tranter auter tegn l'interpresa da participaziun HBM Healthcare cun sez a Zug ina part da las aczias da l'AAA.

Engrondir il sectur da fatschenta cunter cancer

L'AAA è spezialisada sin medischina moleculara nucleara, che serva a la diagnosa ed il tractament da grevas malsognas da cancer. L'interpresa dispona da la terapia da radio-ligand-luthater, ch'è admessa dapi il settember en Svizra. In'admissiun per ils Stadis Unids vegn actualmain examinada. Cun il medicament vegnan tractads tumors neuro-endocrins. L'onn passà ha l'interpresa fatg ina svieuta da 109 milliuns euros. La gruppa gestiunescha 21 lieus da producziun e perscrutaziun cun radund 550 impiegads en 13 pajais – tranter auter era en Svizra.

Per Novartis munta l'acquisiziun in schlargiament dal sectur da fatschenta che cumbatta las malsognas da cancer. E quai betg sulet cun singuls products, mabain gist cun ina nova plattafurma da tecnologia cun pussaivlas applicaziuns per divers programs oncologics.

RR novitads 09:00