Dapi il na a la refurma da la taglia sin interpresas trais (USR III) han la Confederaziun ed ils chantuns lavurà intensivamain vi dad ina nova proposta per refurmar il sistem da taglia sin interpresas.
Uss gievgia avantmezdi è vegnida preschentada l’idea nova. L'uschenumnà project da taglia 17 è redimensiunà e cuntegna las pli impurtantas pretaisas dals adversaris.
Uschia desista il project da taglia 17 dad elements dispitaivels sco per exempel la pussaivladad per las interpraisas da trair giu in tschains fictiv sin l'agen chapital. Da l'autra vart duain ils supplements per famiglias minimals vegnir auzads per 30 francs sin 230 francs. En pli duai vegnir refurmà il sistem da taglias sin dividendas.
Las emprimas reacziuns da las partidas e da las gruppas d'interess mussan che nagin è propi cuntents cun la proposta da la gruppa da lavur.
Per la ps n’è la taglia sin las dividendas betg auta avunda. Enstagl da 70% pretendan els ina taxa da 100%. Memia pitschen è per ella sco era per ils verds l’augment dals supplements da famiglia. La ps pretenda in augment da 100 francs e na betg mo da 30 francs.
L’Uniun sindicala Svizra vesa en l’augment dals supplements da famiglia bain in pass en la dretga direcziun. Il medem mument tema ella dentant che las taglias d’interpresas vegnan pervia dal project da taglia 17 sbassadas anc pli fitg che tar la davosa refurma.
La pps vul l’emprim prender sut la marella las propostas da la gruppa da lavur. Ussa stoppian ils chantuns elavurar e preschentar lur mesiras da taglia e far adatg che betg ils pajataglia stoppian star botta per interpresas che bandunan la Svizra.
Cuntents cun las propostas è dentant l’Uniun da las citads svizras. La direcziun saja la dretga. Pretensiuns centralas da las citads sco per exempel la cumpensaziun da sperditas da taglia per citads e vischnancas duain dentant vegnir fixadas en la lescha.
Ed era la pcd vesa dapli positiv che negativ en la proposta ch’è ussa sin maisa. Ils puncts principals correspundian per gronda part a lur pretensiuns. Positiv saja che la cumpart pli auta da la taglia federala directa per ils chantuns fetschia vinavant part dal project. Impurtant saja era ch’ils basegns dals chantuns e da las vischnancas vegnian resguardads ella revisiun.
RR novitads 11:00