Pertge custan tests da corona davent dad uss? Il Cussegl federal n'è betg pli pront da pajar ils 50 milliuns francs che tests gratuits custan mintg'emna. Il Cussegl federal vul era promover la vaccinaziun cun ina campagna d'infurmaziun da pliras emnas e motivar uschè bleras persunas indecisas sco pussaivel da sa vaccinar.
Quant custan ils differents tests? I dependa nua ch'ins fa ils tests. Bleras apotecas fan vinavant dar 47 francs, tant paja la Confederaziun ad els. A l'eroport da Turitg custan tests d'antigen dentant fin 80 francs, a l'Olma a Son Gagl survegn ins ils tests gia per 26,50 francs.
Tgi survegn er vinavant ils tests gratuits? La Confederaziun surpiglia er vinavant ils custs per tests da persunas sut 16 onns e per quels che han gia laschà vaccinar ina giada. Tests repetitivs en scolas e manaschis restan er gratuits. Tgi che fa il test pervi da sintoms da corona na sto era betg pajar, ma na survegn era betg in certificat.
En il Grischun pon ins era survegnir in certificat suenter in test en manaschi. Quel vala per 72 uras.
Co statti cun persunas che na pon betg sa vaccinar per motivs da sanadad? Persunas cun in attest dal medi survegnan er vinavant tests gratuits. Dapi curt datti dentant la vaccinaziun da Johnson & Johnson er en Svizra. Tgi che reagescha allergic sin ils vaccins da mRNA po uss sa laschar vaccinar cun quai vaccin classic.
En il Grischun pon mintgin u mintgina davent da 18 onns s'annunziar per il nov vaccin. I na dat naginas ulteriuras restricziuns. Il vaccin da vectur da J&J dovra be ina squitta.
Tge munta la nova regla per las vacanzas d'atun? Per persunas betg vaccinadas vegn in viadi en l'exteriur pli char. Sper il test pussaivel per entrar en in auter pajais ston ins era avair in test per entrar en Svizra e sto far in ulteriur test quatter fin set dis pli tard.
