En las fatschentas a Cuira chatt’ins strusch la nova bancnota da 10. Betg en il Coop, betg en il Manor ed n'er betg en la Migros. Er la vendidra dal H&M na po betg gidar. Ella saja leda, ch’els n'hajan betg anc la nova bancnota, quellas sajan memia pitschnas.
Pir en l’Amavita, l’apoteca en il sutpassadi da la staziun, chattain nus ina da las novas bancnotas da 10. Ella mussa ils mauns d’ina dirigenta, il tunnel dal Gotthard ed in mecanissem d’in’ura.
Quella da 10 n’è betg uschè tschertgada
Ì haja bain dà dapli clientella la damaun cura che la nova da 10 è cumparida, di Sven Cortesi, cussegliader da clientella privata tar la banca chantunala en la sedia principala a Cuira. Grondas fullas n'haja quai dentant betg dà. Ì pari, che la clientella saja sa disada, che las bancnotas actualas vegnian midadas ora.
Ma cunquai ch’ins na chattia per regla betg las bancnotas da 10 en ils bancomats saja quai schon pussaivel, che la nova bancnota da 10 haja pli ditg da sa derasar che la nova da 20 ni da 50.
Il tip per tgi che vul vesair ella tuttina immediatamain...
Tgi che less avair la bancnota immediatmain en il maun po ir tar las bancas vi dal spurtegl per far sia transacziun. Ultra da quai datti dus bancomats da la Banca Chantunala che cuntegnan bancnotas da 10, in a Cuira ed in a Glion.
RTR Telesguard 17:40