Entant ch'il sistem actual dependa dal possess d'in apparat per recepir ils programs, preveda la nova lescha che tut las chasadas stoppian pajar ina taglia. La summa per ina chasada pudess uschia vegnir reducida da 462,50 francs sin 400 francs.
Ils aderents manegian che quasi tuts disponian oz d'apparats da recepziun e ch'il problem actual sajan ils auditurs ed aspectaturs «nairs». Ils adversaris replitgeschan ch'i saja malgist da far pajar era persunas che na consumeschian propi nagins programs.
Interpresas cun gronda svieuta pajan
Cun la nova lescha avessan er in quart da las interpresas da pajar l'imposta da radio e televisiun, numnadamain quellas cun ina gronda svieuta. Ils adversaris vesan quai sco ina dubla taxaziun malgista, entant ch'ils aderents menziunan che talas firmas profiteschian tut auter da las medias che persunas privatas e che bleras interpresas stuessan en sasez gia ussa pajar la taxa e na fetschian quai.