Siglir tar il cuntegn

Header

cuntegn

Svizra Nov vitg da Heidi per 100 milliuns en la regiun Flumserberg

En il Tannenboden duai dar in nov vitg da Heidi cun dus novs hotels, ina nova telecabina sin il Maschgenkamm ed in percurs tras l'istogia da Heidi sin l'alp da Mols. Tras la nova purschida quinta la regiun Flumserberg cun 200'000 giasts dapli ad onn.

Ils projects èn vegnids sviluppads sin fundament dal concept da svilup turistc Flumserberg. Sa participadas èn las pendicularas da Flumserberg, la corporaziun d'alp Mols e l'Uffizi per economia e lavur dal chantun Son Gagl.

Nova telecabina

Las pendicularas Flumserberg planiseschan da bajegiar ina nova telecabina cun gondlas da mintgamai 10 persunas davent dal Tannenboden sin il Maschgenkamm. La telecabina po transportar var 4'000 persunas per ura e duai remplazzar la telecabina cun gondlas da 4 persunas e la sutgera Chrüz. Or dal bajetg da manaschi existent èsi previs da far in lieu da sentupada. L'avertura è planisada per la stad 2018.

Dus novs hotels ed ina garascha sutterana

Datiers da la nova staziun a val da la telecabina èn planisads dus hotels cun 100 ed 80 chombras. Ina garascha sutterana duai porscher ulteriurs 200 parcadis tar ils 200 gia existens.

Heidi per in di

Il concept da svilup turistic haja mussà che l'agricultura pudess anc vergnir nizzegiada pli fitg per il turissem. Perquei duai l'alp da Mols daventer il lieu nua ch'igl è pussaivel da scuvrir Heidi a moda autentica. L'idea è ch'il giast possia visitar durant in di differents posts dadens e dador che mainan tras l'istorgia da Heidi.

Las purschidas gia existentas sin l'alp sco p. ex. la chascharia ubain la pussaivladad da star sur notg vegnan modernisadas ed integradas en l'istorgia da Heidi. Per l'entir project èn previs be per la part da Heidi radund 12 milliuns francs. Tenor ils responsbels na duai la nova purschida da Heidi sin il Flumserberg betg esser ina concurrenza tar il vitg da Heidi a Maiavilla, mabain cumplettar quel.

Proxims pass

Emprims discurs cun investiders hai gia dà. Ussa saja da giuditgar ils singuls interessents ed interess, scrivan ils responsabels. Quai en ina concurrenza d'investurs.

Ils fans da Heidi vulan visitar il lieu original e quai è la tegia d’alp a Maiavilla.
Autur: Hans-Jörg Müntener president dal cussegl d’administraziun

Ils responsabels dal vitg da Heidi a Maiavilla na savevan nagut dals plans dal chantun Son Gagl da bajegiar in’ulteriura attracziun turistica enturn Heidi a Flumserberg. Quai ha il president dal cussegl d’administraziun Hans-Jörg Müntener ditg ad RTR. El na tema dentant betg la concurrenza: Ils fans da Heidi veglian visitar il lieu original da Heidi e quai saja la tegia d’alp a Maiavilla.

Artitgels legids il pli savens