Las midadas sajan pli pitschnas che l’ultima giada cun l’introducziun dal urari dal tunnel da basa dal Gottard, ha ditg David Henny, manader da la planisaziun per purschidas dal transport da passagiers da l’SBB. Ils passagiers na vulan betg pli sulet viagiar da A tar B mabain lavurar e sa sentir bain en il tren, ha accentuà Henny. Perquai vegnia la planisaziun da las purschidas en ils trens adina pli impurtanta. Ina da las finamiras fin il 2022 saja da cuntanscher ina marca nua ch’il client sappia tge che spetga el, ha ditg Henny. Ina clera purschida cun ina qualitad definida.
Pliras midads che vegnan pass per pass
Ils trens da las lingias da InterRegio ed InterCity survegnan novs numers. La numeraziun nova s'orientescha a la logica da la rait da vias naziunala da l'Uffizi federal da vias. Il tren da Cuira a Turitg vegn uschia a purtar da nov il numer «IC3», scriva la SBB.
Colliaziuns internaziunalas sco schanza
Ulteriurs meglieraments da purschida datti er en il traffic internaziunal cun l'Italia e la Germania, quai communitgeschan las Viafiers federalas. Nov vegn quai a dar ina colliaziun directa tranter Frankfurt e Milaun via la Svizra, sco era ina colliaziun da Turitg a Venezia. Quai porschia schanzas per il turissem, uschia Henny. Era datti novas colliaziuns en Svizra, per exempel tranter Genevra sur Berna a Lucerna cun fermadas a Nyon, Morges, Palézieux e Romont.
RR novitads 15:00