Siglir tar il cuntegn
Inhalt

Svizra Nov urari da tren

Il nov urari da tren ch'è dapi oz dumengia en funcziun porta meglieraziuns a las regiuns perifericas dal Grischun sco er a la Svizra romanda ed al Tessin.

La tabla gronda cun las proximas partenzas a la staziun da Turitg.
Legenda: Dapi oz dumengia vala in nov urari da tren. Keystone

Dapi oz en damaun vala il nov urari per il traffic public. En il Grischun profiteschan tranter auter las regiuns pli perifericas. Tant l'Engiadina sco il Puschlav survegnan novas colliaziuns vers Cuira baud la damaun. Ed er sin las lingias da la Surselva e d'Arosa vers la chapitala dal chantun meglierescha la Viafier retica sia purschida.
Las Viafiers federalas porschan dapli cunzunt a lur clientella en la Svizra romanda ed en il Tessin. Vitiers vegnan meglras colliaziuns cun l'Italia e la Germania.

Meglieras collliaziuns per la Svizra romanda

Per exempel ferma il tren interregiunal da Genevra-Eroport via Berna a Lucerna er a Nyon, Morges, Palézieux e Romont. Per Nyon e Morges munta quai ina nova colliaziun directa a Lucerna ed a Berna. Nov datti er colliaziuns directas da Frankfurt a Milaun sco er da Turitg a Venezia. Per il traject da Frankfurt a Milaun dovra il tren 7 uras e mez.

Ferrovia Mendrisio-Varese

En il Tessin datti cun l'introducziun da la Ferrovia Mendrisio-Varese ina nova colliaziun: Las lingias da las S40 e S50 davent da Stabio vegnan prolungadas fin a Varese. Davent da proxima stad vegn la S40 schizunt a cursar fin a la plazza aviatica Malpensa sper Milaun.

RR novitads 11:00