Siglir tar il cuntegn
Inhalt

Svizra Nov tunnel dal Gottard marca er urari 2017 da VFF

Curt avant l’avertura dal tunnel da basa dal Gottard la mesemna proxima han las Viafiers federalas svizras publitgà detagls davart l’urari 2017. Quel è cumplainamain sut l’ensaina dal Gottard, porta dentant ulteriuras midadas.

Tablas cun il temp da partida da trens sin ina staziun.
Legenda: Il nov urari da la VFF na porta betg mo midadas al Gottard. Keystone

L’urari 2017 da la VFF è semtgà. Las pli grondas novaziuns porta il tunnel da basa dal Gottard. Quel scursanescha il temp da viadi tranter nord e sid per radund 30 minutas. Il potenzial cumplain dal nov tunnel vegn dentant pir ad esser da sentir cura ch’era il tunnel da basa dal Ceneri avra la fin dal 2020. Lura pon ins spargnar 60 minutas tranter la Svizra tudestga e l’Italia, fin il Tessin dal sid 45 minutas.

A partir da la fin dal 2020 charreschan ils trens tranter la Svizra tudestga ed il Tessin lura en il tact da mes’ura empè da mintg’ura. E tranter Turitg e Milaun datti nov mintg’ura ina colliaziun empè da mintga duas uras.

Lingia muntagnarda vegn mantegnida per turists

Las Viafiers federalas planiseschan en il nov urari er da charrar sin la lingia muntagnarda da fin qua. Mintg’ura duai quai dar ina purschida da trens regiunals cun colliaziuns al traffic da transit ad Erstfeld, Bellinzona e Lugano. Ils trens interregiunals da Basel e Turitg duain en il futur charrar fin Erstfeld.

Ulteriuras midadas impurtantas dal nov urari VFF (a partir dals 11 da december):

  • Ils trens interregiunals sin la lingia Losanna–Sion–Brig ferman pli savens a Bex e Leuk.
  • Sin la lingia Bienna–Delémont–Basilea VFF survegn il tren cun partida Basilea VFF a las 06:03 nov dus pendulins d’Intercity. Uschia datti dubel uschè blers plazs da seser per ils viagiaturs.
  • Il tren interregiunal cun partida a las 04:21 da Berna sa ferma nov er a la staziun principala da Turitg empè be a l’eroport. Uschia datti nov er per Berna, Olten ed Aarau ina colliaziun a bun’ura a Turitg.
  • Nov express regiunal Erstfeld–Bellinzona en tact da l’ura, singuls trens van vinavant fin Lugano e Milano Centrale.

RR novitads 14:00

Tunnel è popular

8 da 10 Svizzers vesan ils custs sco giustifitgads. Els èn er da l'idea ch'il project saja impurtant per la reputaziun da la Svizra en l'exteriur.

Mo in quart dals dumandads avess investì las 12,2 milliardas francs per ils trajects da pendularis surchargiads, communitgescha l'institut da perscrutaziun d'opiniuns Demoscope.