Siglir tar il cuntegn

Svizra Nov secretari statal per dumondas da finanzas internaziunalas

Jörg Gasser, il secretari general dal departament federal da finanzas, daventa il nov secretari statal per dumondas da finanzas internaziunalas. Il Cussegl federal ha elegì Gasser sco successur da Jacques da Watteville che banduna il secretariat da stadi la fin da zercladur.

Jörg Gasser.
Legenda: Avant il temp en l’administraziun federala è Jörg Gasser stà activ per il Comité internaziunal da la Crusch cotschna. Keystone

La carriera da Gasser en l'administraziun federala ha cumenzà sco collavuratur scientific. Il 2009 ha l'anteriura cussegliera Eveline Widmer Schlumpf clamà l'econom sco directur ad interim da l'uffizi per migraziun.

Successur da diplomats versads

Jörg Gasser succeda ussa a dus diplomats versads. Sco ultim ha de Watteville timunà il secretariat statal.

La fin da zercladur va el en pensiun, salva però ses mandat sco schefdelegà per il dossier da l'Uniun europeica. De Watteville era succedì a Michael Ambühl. Omadus èn stads participads a tractativas impurtantas tranter la Svizra e l'UE.

Avant il temp en l’administraziun federala è Gasser stà activ per il Comité internaziunal da la Crusch Cotschna, tranter auter sco suppleant dal schefdelegà en regiuns da crisa.

RR novitads 14:00