Siglir tar il cuntegn

Header

cuntegn

Svizra Nov directur per la Pro Helvetia

Philippe Bischof daventa nov directur da la Pro Helvetia. Quai ha communitgà la fundaziun da cultura il mardi.

Il cussegl da fundaziun da la Pro Helvetia ha elegì Philippe Bischof sco nov directur. El entra en funcziun l’emprim da november 2017. Bischof è actualmain manader da la partiziun da cultura dal uffizi presidial da Basilea-Citad. En questa funcziun maina el tranter auter ils museums chantunals, l’archiv chantunal e la perscrutaziun archeologica dal terren.

Philippe Bischof ha 50 onns ed è engaschà dapi 25 onns en differentas funcziuns da la sparta cultura. Plinavant è el dapi quest onn president da la conferenza dals incumbensads chantunals da cultura.

Elegì unanimamain

Il cussegl da fundaziun da la Pro Helvetia haja elegì Bischof unanimamain ord 104 candidaturas. Bischof saja il candidat ideal per las sfidas da quest uffizi. Quai surtut areguard l’elavuraziun da la proxima missiva da cultura.

Bischof succeda ad Andrew Holland che ha demissiunà il november 2016 ord raschuns persunalas. Ad interim ha quella giada Sabina Schwarzenbach surpiglià da manar la fundaziun.

RR novitads 16:00

Artitgels legids il pli savens