Siglir tar il cuntegn
Inhalt

Svizra Notenstein La Roche stritga 20% da sias plazzas

La banca privata Notenstein La Roche ha communitgà ch'ella stritga fin en dus onns 100 da sias 500 plazzas da lavur. Cun spargnar tar il persunal cuntinuescha la banca sia restructuraziun. En tut vul ella reducir ses custs per 20%.

Il logo da la banca privata.
Legenda: Uss vegn spargnà tar il persunal: La banca privata stritga 100 da sias 500 plazzas da lavur. Keystone

Quants collavuraturs ch’èn pertutgads n’è tenor Notenstein anc betg clar. Ina pledadra ha ditg envers l’agentura da novitads svizra sda, che relaschadas na sajan betg dad excluder. La reducziun dal persunal è part dad in program da respargn. Quel vul reducir ils custs da la banca per 20%.

L'emna passada ha Notenstein fatg a savair ch'ella reducescha la direcziun da set sin tschintg commembers e gia il zercladur ha la banca privata annunzià mesiras da spargn. Latiers tutgan relaschadas, pensiunaments anticipads e reducziuns da pensums da lavur.

Tar las mesiras da restructuraziun tar il persunal scriva la banca privata uss, ch’ella vul tras questa «cuntinuaziun dal svilup da ses model da gestiun» «scuntrar al conturn provocant sin il plaz da finanzas svizzer».

En l’avegnir duajan las duas bancas Raiffeisen e Notenstein collavurar anc meglier per pudair porscher la cussegliaziun adequata per ses clients – quai di Patrick Gisel, CEO da la gruppa Raiffeisen e president dal cussegl administrativ da la Notenstein. Uschia surpiglia Notenstein la fin da l’onn che vegn tut ils mandats da cussegliaziun da facultad entaifer la gruppa Raiffeisen.

RR novitads 10:00

Notenstein La Roche

  • è ina banca privata spezialisada sin cussegliaziun ed administraziun da facultads
  • è dapi il 2012 ina societad affiliada da la Raiffeisen Svizra
  • ha 13 lieus d’affars en la Svizra
  • ha – anc uss – 500 collavuraturas e collavuraturs
  • administrescha facultads da totalmain 21 milliardas francs