Perquai saja quai nairas uras che la lescha vegnia adattada, uschè l'incumbensà per la protecziun da datas dal chantun Grischun Thomas Casanova. Però dal tut cuntent n'è Thomas Casanova betg cun la revisiun ch'i duai dar.
Chastis fitg bass
En spezial n'è el betg cuntent cun ils chastis che firmas duain survegnir sch'i na tegnan betg en las reglas. In chasti maximal da 250’000 francs è planisà.
Per firmas sco Google ni Facebook n'èn quels 250’000 francs quasi nagut.
Congualà cun l'Uniun europeica, che ha avant curt introducì ina nova lescha, saja quai in pitschen chasti di Casanova. En l’UE ston las firmas pajar fin maximal 20% da la svieuta annuala d'ina firma.
Utilisaders gudognan
Però per las utilisadras ed ils utilisaders empermetta la revisiun da porscher dapli transparenza. In fatg che l’incumbensà per la protecziun da datas beneventa. Ins duai per exempel survegnir il dretg da laschar stizzar tut las atgnas datas tar ina firma.
Per l'utilisader e l'utilisadra duai tut vegnir pli transparent.
E las ominusas «cundiziuns generalas da fatschenta», las AGB duain dar ina meglra survista: enstagl da paginas ad infinit cun text scrit pitschen duai dar ina curta survista da las cundiziuns. Però sch’ins vul duvrar in servetsch, sco per exempel ina app, lura ston ins era en l'avegnir dar liber las atgnas datas. L’unica metoda per evitar ch'ina firma po ramassar las datas è era suenter la revisiun da la lescha da betg far diever dals servetschs.
La revisiun
Il Cussegl naziunal ha debattà en la sessiun da stad davart la revisiun da la lescha per la protecziun da datas. La Chombra gronda ha decis da partir si la revisiun en duas parts. E cun quai vul il Cussegl naziunal adattar entant mo la part che sto vegnir adattada per ademplir las cundiziuns da Schengen. Sco proxim debattescha il Cussegl dals chantuns.
RR novitads 07:00