Siglir tar il cuntegn

Svizra «Nez Rouge» è popular

Il servetsch da taxi voluntari «Nez Rouge» è popular: Dapi l’entschatta dal mais hajan 20’500 persunas fatg diever da la purschida da vegnir transportadas a chasa en l’agen auto. Sulettamain sur Nadal ha il servetsch nudà 4'000 transports. Quai ha communitgà «Nez Rouge».

Purtret d'in auto da Nez Rouge.
Legenda: «Nez Rouge», in servetsch apprezià durant ils dis da festa. Keystone
  • Dapi l’entschatta da december sajan 6’282 voluntaris stads en acziun.
  • 20'500 persunas èn vegnidas transportadas l'entschatta dal mais.
  • 4'000 persunas èn vegnidas transportadas sulet da Nadal.

L'Argovia dovra il pli bler il servetsch

Il pli bler success ha la purschida en il chantun Argovia. Là èn vegnids fatgs ils pli blers viadis (1'392) ed era accumpagnà las pli bleras persunas (3'747), fatg ils pli blers kilometers (69'772) ed ils pli blers voluntaris èn stads en acziun là (878). Il segund bler è la purschida vegnida nizzegiada en il Giura, il pli pauc en il Grischun.

Las differenzas hajan dentant da far pli pauc cun il sa cuntegnair dal baiver e dapli cun la purschida dal servetsch da taxi voluntari. En il chantun Argovia sajan ils chauffeurs da viadi l'entir december, en auters chantuns, be las fin d'emnas, l'emna avant Nadal e durant ils dis da festa.

Trais voluntaris per in viadi

Ils teams da Nez Rouge van mintgamai en gruppas da trais persunas tar il client. Duas persunas accumpognan a chasa il client e la terza persuna va a chasa cun l'auto da lez. In è chauffeur, l'auter è accumpagnader ed era secretari dal team. La terza persuna suonda cun l'auto dal client. Suenter vai enavant tar il proxim viadi.

RR novitads 16:00

«Nez Rouge»

L'organisaziun datti gia dapi l'onn 1990. La finamira dal servetsch è da reducir accidents da traffic che vegnan chaschunads da glieud alcoholisada. L'organisaziun n'è betg orientada al profit.