Siglir tar il cuntegn
Inhalt

Svizra Nauschas prognosas per ils producents da puma grischuns

La schelira dals ultims dis ha chaschunà gronds donns vi da la pumera - quai tant en Svizra sco era en il Grischun. Pervia da las temperaturas miaivlas avant Pasca eran las plantas gia en plaina fluriziun, duas emnas pli baud che usità.

Legende: Video Kiwis en il Grischun abspielen. Laufzeit 01:09 Minuten.
Or da Actualitad video dals 25.04.2017.

Cifras concretas datti però pir en trais fin quatter emnas. Quai ha ditg il manader da la pumicultura al Plantahof, Marco Frey, envers RTR.

Tar ils mailers e pairers saja la situaziun dentant precara, quai surtut en la regiun da Malans. En la vallada dal Rain en general vesia ora mal per las apricosas, las tschareschas ed ivas ch'èn gia en la fasa da fritg. Kiwis na vegnia quai schizunt a dar nagins quest onn, uschia Frey.

Ils proxims dis èsi danovamain da spetgar cun trid'aura e naiv.

Donns considerabels vid la pumera svizra

Ina frastga d'in pumer surtratga cun glatsch
Legenda: La schelira dals ultims dis chaschuna gronds donns. Keystone

Las notgs da schelira da la davos'emna han era fatg gronds donns a la pumera en Svizra. Pervia da las temperaturas miaivlas avant Pasca eran las plantas gia en plaina fluriziun, duas emnas pli baud che usità.

L'uniun da pumicultura svizra na po anc communitgar naginas cifras dals donns. Anc manchian las annunzias ord ils territoris da pumera. Il directur da l'uniun da pumicultura Georg Bregy ha titulà ils donns sco «considerabels», el discura da onns da plirs tozzels milliuns francs. La schelira na saja dapi 40 onns betg pli stada uschè ferma. Tar tscherts manaschis saja l'entira racolta destruida.

40% da la vigna è vegnida donnegiada en il Vallais

Purtret d'in apricoser e las flurs scheladas cun si chandailas da glatsch che pendan.
Legenda: In apricoser en il Vallais ch'era gia vid flurir avant che la schelira è vegnida. Keystone

Betg mo il Grischun, er il Vallais ha patì da la scheltira da las davosas emnas. Tenor l'uffizi per viticultura sajan passa 40% da las vignas vegnidas donnegiadas ferm. Tar las apricosas hajan schizunt duas terzas da las surfatschas cultivadas patì gronds donns. Intgins purs da vin e da puma hajan pers pervi da la scheltira praticamain lur entira raccolta.

Ina tala perioda da scheltira che pertutgia tut las vignans vallesanas saja extraordinaria. Tenor las autoritads saja quai stà il cas la davosa giada il 1974.

RR novitads 18:00 +