71'579 votantas e votants han ditg na al credit da 100 milliuns francs. Quai vers 61'019 che han ditg gea. Uschia resulta ina cumpart da 53,98% ch'han refusà gieus olimpics d'enviern en il Vallais. Sulettamain en la part sura dal Vallais è resultà ina maioritad da 51%.
Gnanc Sion sez che vuleva
Era la chapitala chantunala Sion ha refusà (68%) da sa participar vi dals custs. Ella che fiss stada previda sco citad ospitanta dals gieus olimpics d'enviern 2026. Però era autras destinaziuns turisticas sco Zermatt (54%), Siders (57%) e Martigny (61%) han refusà il project.
Restan anc 6 interessents per ils gieus d'enviern 2026
Uschia ha il project «Sion 2026» fatg naufragi. Previs fissan stads gieus e concurrenzas en ils chantuns Vallais, Vad, Friburg, Berna e Grischun (San Murezzan). Per ils gieus dal 2026 restan pia anc ils interessents Calgary (Canada), Cortina d'Ampezzo/Milano/Torino, Graz, Sapporo, Stockholm ed Erzurum (Tirchia). Ils gieus vegnan surdads il settember 2019 a Milano.
RR novitads 14:00