Naginas controllas supplementaras dals cunfins

Controllas supplementaras dals cunfins duain procurar per dapli segirezza. Quai pretenda la PPS. Il Cussegl dals chantuns è encunter.

Collavuraturs da la guardia da cunfin en in biro

Legenda da maletgs: Il Cussegl dals chantuns na vul naginas controllas sistematicas als cunfins. Keystone

Il Cussegl dals chantuns na vul naginas controllas sistematicas dals cunfins. El ha refusà ina intervenziun parlamentara da la fracziun da la Partida populara svizra. Quai cleramain cun 37 cunter 6 vuschs.

La PPS ha argumentà lur pretensiun cun la crisa da fugitivs, dentant er cun las attatgas da Paris avant 3 emnas e cun il turissem criminal. Al Cussegl federal renfatscha ella da betg avair sut controlla la situaziun e d'esser memia passiv en chausas.

Ils adversaris han fatg attent ch’ina controlla da radund 750’000 traversadas dal cunfin a di saja nunpussaivla. Ina tala controlla rigurusa na saja er avant la cunvegna da Schengen betg vegnida fatga, argumenteschan ils adversaris plinavant. L’intensitad da las controllas possia dentant vegnir auzada. Quai saja dentant gia succedì las ultimas emnas.

Il Cussegl naziunal vegn a tractar la gievgia pliras dumondas davart la crisa da fugitivs.

RR novitads 06:00