Siglir tar il cuntegn

Header

Navigaziun

Ina saiv da cunfin en l'Ungaria - ina tala na duai betg dar enturn Svizra.
Legenda: Talas saivs sco al cunfin da l'Ungaria na vul il Cussegl federal betg al cunfin svizzer. Keystone
cuntegn

Svizra Nagina saiv da cunfin enturn la Svizra

Il Cussegl federal na vul betg construir ina saiv da cunfin. Ina tala saiv fiss chara, giuridicamain dispitaivla e da pitschen niz, quai la resposta dal Cussegl federal sin l’interpellaziun dal cusseglier naziunal grischun da la PPS Heinz Brand.

Mirs e saivs als cunfins n’èn betg mo in tema en ils Stadis Unids da l’America. Er en Svizra datti talas pretensiuns.

Be paucs sur il cunfin verd

Il cusseglier naziunal grischun Heinz Brand aveva dumandà il Cussegl federal, sch'i dettia plans per ina tala saiv da cunfin en la regiun da Chiasso e sche betg, schebain il Cussegl federal vegnia a far tals plans proximamain. Blers pajais en l’Europa hajan cumenzà a construir talas saivs da cunfin per proteger il pajais, scriva Brand en sia interpellaziun al Cussegl federal.

Heinz Brand, cusseglier naziunal da la PPS.
Legenda: Heinz Brand, cusseglier naziunal da la PPS. Keystone

En sia resposta punctuescha il Cussegl federal che la gronda part dals migrants arrivian en Svizra cun il tren. Radund 85% da tuttas persuna entradas illegalmain en il Tessin vegnan tschiffadas a la staziun a Chiasso. Al cunfin verd hajan ins schizunt durant il temp da grondas fullas da migrants be tschiffà paucas persunas.

Situaziun giuridica nunclera

Ultra da cameras sper sendas nizzegia la guardia da cunfin er dronas e helicopters per identifitgar migrants al cunfin verd. Ina saiv da cunfin fiss in mez fitg char per reducir anc pli fitg la migraziun illegala.

Brand aveva er fatg dumondas areguard la situaziun giuridica. Qua ha il Cussegl federal respundì ch’i na dettia naginas cleras reglamentaziuns per la construcziun d’implants da protecziun dal cunfin.

RR novitads 17:00