Nagina limita maximala per premias da cassas da malsauns

Il Cussegl dals chantuns ha refusà ina moziun che vuleva francar premias maximalas.

In satg da plastic transparent cun en plain bancnotas da 10.-.

Legenda da maletgs: La moziun vulaiva francar las premias per cassas da malsauns sin maximum 10% da las entradas. Keystone

La moziun vuleva cuntanscher che las premias da la cassa da malsauns na surpassian betg 10% da las entradas d'in tegnairchasa. Las premias sajan creschidas ils ultims onns bler pli fitg che las pajas, ha ditg Liliane Maury Pasquier da la PS dal chantun Genevra ch'ha inoltrà la moziun. Tscherts tegnairchasas impundian oz dapli che 20% per las cassas da malsauns e quai saja da memia. Ultra da quai dettia differenzas da chantun a chantun quai che pertutga la reducziun da las premias. Ord motivs finanzials desistian adina dapli persunas da consultar in medi, ha punctuà Pasquier. La fin dals quints vegnia quai pli char per la sanadad publica.

Moziun chatta amis mo tar PS

Sulettamain la Partida socialdemocrata ha sustegnì la moziun da Pasquier. Malgrà che quai vegnia a chaschunar custs supplementars da radund duas milliardas francs saja quai giustifitgabel.

Er il Cussegl federal aveva cusseglià da refusar questa moziun.

La decisiun è crudada cun 31 cunter 13 vuschs.

RR novitads 12:00