Tenor emprimas indicaziuns da la polizia haja quai dà vers las 22:00 ina dispita ferventa tranter in um (30) ed ina dunna (30) en la stanza da l’hotel. Giasts da l'hotel a Näfels hajan udì canera e sbragizi da la stanza e sajan currids a gidar. Là hajan els inscuntrà l'um betg armà e la dunna grevamain blessada ed hajan separà ils dus.
L’um tirc haja lura pers la schientscha e saja mort malgrà la reanimaziun anc sin il lieu. La dunna svizra saja vegnida transportada grevamain ferida cun l’helicopter en l’ospital da l’Universitad da Turitg. La raschun per la dispita u la raschun pertge che l'um saja mort vegn sclerida, scriva la polizia dal chantun Glaruna en ina communicaziun.
La polizia ha dentant communitgà, che l’um saja arrivà la gievgia cun in aviun da la Turkish Airline da la Tirchia en Svizra. En l’aviun haja el gia attratg l’attenziun cun avair empruvà da far mangiar ad auters passagiers jogurt e cun clamar «Allahu Akbar». A l'eroport da Turitg era el vegnì surdà a la polizia. El haja lura pers la schientscha e saja vegnì purtà per la notg en l'ospital.
Apaina ch'ella haja infurmaziuns essenzialas da las investigaziuns infurmeschia ella puspè, scriva la polizia chantunala sin sia pagina en la rait.
RR novitads 14:00