En l'emissiun da satira «Deville Late Night», ils 25 da november 2016 è il moderatur Dominic Deville sa deditgà al tema energia nucleara. Quai è stà dus dis avant la votaziun davart l'iniziativa da sortir da l'energia atomara. In aspectatur ha lura reclamà directamain tar il mediatur public da l'SRG SSR. L'emissiun haja intenziunadamain gì il messadi da vuschar per l'iniziativa da sortir l'energia atomara.
En ses rapport final ha il mediatur public dà raschun a questa reclamaziun. Avant votaziuns ed elecziuns saja spezialmain impurtant da resguardar l'obligaziun d'esser diligent. Ils parairis divers sajan da resguardar en tuttas emissiuns er en quellas da satira.
L'emissiun pertutgada:
La redacziun da comedy dad SRF aveva argumentà che la pratica lubeschia a la satira da s'exprimer a moda e maniera tendenziusa e betg equilibrada. Tar l'emissiun «Deville Late Night» saja cleramain visibel ch'i sa tractia d'ina emissiun satirica. Che quai na saja betg adina cler per tut ils aspectaturs saja sur tut il cas tar emissiuns pli novas che na sajan betg anc etablidas.
Emissiun da propaganda per l'iniziativa
Blum ha dentant constatà che l'emissiun saja en plirs lieus ina «emissiun da propaganda per l'iniziativa da sortir l'energia atomara». El numna qua la moderaziun visualisada a l'entschatta, en l'accent principal tematic tranter las minutas 6:40 enfin 11:50 sco era a la fin da l'emissiun.
Nagin na po scumandar a Dominic Deville dad esser per l'iniziativa da sortir l'energia atomara, el na po dentant betg far or da sia emissiun ina da propaganda, n'er betg en ina moda satirica.
Uschia finescha Roger Blum ses rapport. L'iniziativa per sortir l'energia atomara, ch'ils Verds avevan lantschà era vegnida refusada dal suveran ils 27 da november 2016.
Autras reclamaziuns n'ha Blum betg pudì sustegnair
Ina critica da pliras parts che ha pertutgà diversas publicaziuns sin SRF News ed ina novitad en il teletext n'ha Blum betg pudì sustegnair. La persuna che aveva reclamà là, aveva crititgà il proceder pertutgant il numnar la naziunalitad dal delinquent en il cas dal center islamic a Schwamendingen a Turitg.
RR novitads 14:00