Siglir tar il cuntegn

Svizra Na a No Billag ed uss?

Cun 71.6% ha il pievel svizzer dà in chanaster a l’iniziativa No Billag. Il pievel ha cun quai mussà ch'el stat davos la SSR, dentant scuà davent, n'è il tema dal service public anc ditg betg – da concessiun, lescha da medias, iniziativas e debattas suenter il na a la No Billag.

Legende: Audio Mezdi: No Billag – Co vinavant cun debattas ed iniziativas? abspielen.
4:56 min, Actualitad dals 05.03.2018.

Il pievel svizzer ha decidì ch'el vul vinavant ina chasa da medias publica. L’iniziativa era per blers memia radicala. Dentant datti da tut las varts pretensiuns per refurmas tar la SSR. La discussiun e la debatta sur da la chasa da medias publica ha pir cumenzà e cuntinuescha sco proxim en il Parlament federal.

La debatta cuntinuescha - Co vai vinavant?

Concessiun

Per il mument è la concessiun en consultaziun. Suenter vegn quella debattada en il parlament. Fin la fin da l'onn dovri ina nova concessiun, perquai che l'actuala scada l'onn 2019.

Il Cussegl federal ha previs en la nova concessiun da sbassar las taxas da radio e da televisiun sin 365 francs l'onn. Mintga dus onns duai vegnir guardà, sche la taxa po vegnir sbassada anc pli fitg, cun quai che la contribuziun per la SSR vegn fixada sin 1.2 milliardas francs.

Era duai vegnir definì che la SSR sto duvrar 50% dals daners per emissiuns d'infurmaziun.

Ed i dat er gia duas propostas (iniziativas parlamentaras) da la vart da la PPS, co che la concessiun duai vegnir adattada.

  • Ina vul sbassar las taxas da radio e televisiun sin 300 francs
  • l'autra vul che las interpresas vegnian puspè deliberadas da las taxas.

Concessiun

Concessiun

La concessiun definescha sin basa da la lescha federala davart radio e televisiun (LRTV), co exact che la SSR ed era emetturs da radio e da televisiun privats, che survegnan raps ord las taxas per radio e televisiun, han da garantir il service public.

Refurma tar la SSR

Parallel cun la debatta davart la concessiun datti midaments tar la SSR. Gist suenter la votaziun da la No Billag ha il directur general da la SSR, Gilles Marchand, annunzià suandantas mesiras da spargn:

  • Pachet da spargn da 100 milliuns: la stad vegn preschentà in plan detaglià.
  • Focus sin mandat da basa: la mesadad da las entradas vegnan investidas en l'infurmaziun.
  • Dapli collavuraziun cun medias privatas.

Lescha da medias

En avegnir duai era dar in midament da la lescha federala davart radio e televisiun (LRTV). Nov duai era dar in artitgel per medias electronicas. Era davart ils midaments da la lescha vegni debatta èn il parlament. Fin il 2022 duess quella esser definida.

RR actualitad 12:00

La dumengia da votaziuns dals 4-3-2018 en survista