En l’aua persa da la citad da Losanna ed en in territori da skis betg numnà, sajan vegnids cumprovads gia ils 9 da december fastizs da la mutaziun.
Curt avant Nadal ha la Gronda Britannia ordinà reglas pli severas pervi da la mutaziun anc pli contagiusa che sa derasia per 50% pli spert che la furma enconuschenta. Divers stadis han sinaquai serrà ils cunfins. La Svizra ha scumandà sgols directs en e da la Gronda Britannia.
Dumber d'infecziuns crescha sin l'entir mund
En l’entir mund s’augmenta il dumber d’infecziuns da corona sin passa 90 milliuns. Quai rapporta l’agentura da novitads Reuters che sa basa sin datas uffizialas. L’Europa è cun 25 milliuns infecziuns la regiun la pli pertutgada. Quai anc avant l’America dal Nord e l’America Latina.
En pli mussian las datas che las mutaziuns chattadas en la Gronda Britannia e l’Africa dal Sid sa derasian spert. In terz da las novas infecziuns dals davos dus dis èn da questas novas variantas.
Cifras da la fin d'emna
En Svizra ed il Principadi da Liechtenstein datti 6'523 novas infecziuns dal coronavirus entaifer las ultimas 72 uras. Ultra da quai sajan 112 persunas mortas en connex cun Covid-19. Da tut ils tests fatgs las ultimas duas emnas sajan bunamain 16% stads positivs. Quai ha communitgà l'Uffizi federal da sanadad.
En il Grischun datti 29 novs cas confermads. Ina persuna è morta pervi da Covid-19. Passa 40 persunas vegnan tgiradas en l'ospital, da quellas èn 6 en la staziun intensiva.
