Siglir tar il cuntegn

Svizra Muria da restaurants nagin fenomen da la periferia

Il 2017 èn svanidas 3 giadas e mez dapli restaurants che l'onn avant. En quasi 700 cas hajan ils manaschis annunzià concurs, scriva la «SonntagsZeitung». Ultra da quai hai era dà in quart damain restaurants novs ch'han avert lur portas.

pusadas plazzadas en ina stgatla
Legenda: Gastrosuisse quinta che la «muria da restaurants» haja trapassà ses maximum. Keystone

Tenor las cifras da Gastrosuisse e la firma d'incasso Creditreform, han total 2220 restaurants serrà, ed ulteriuras 684 han fatg concurs. Da l'autra vart ha quai dà 2048 restaurants novs en il register da commerzi svizzer. Uschia resulta ina «muria» da restaurants da 856.

Era regiuns urbanas pateschan

Cler è sin basa da las cifras che la periferia è pertutgada. Però surtut tar l'avertura da novs restaurants sa midia quai. Là èn pertutgads surtut chantuns sco il Tessin, Berna, Genevra, Lucerna e Turitg. Là vesan ils spezialists surtut anc potenzial en il sectur elevà da la gastronomia.

Purificaziun da las structuras

Tenor il president da Gastrosuisse Casimir Platzer datti pliras raschuns: D'ina vart il ferm franc svizzer, marschas pitschnas, investiziuns spustadas e la finala memia paucas reservas. Quai deplorescha Platzer bain, fa però era valair vers la «SonntagsZeitung» ina purificaziun da las sturcturas necessaria. Tendenzialmain dettia quai anc adina plitost memia blers restaurants, cumpareglià cun il potenzial sin il martgà.

Tuttina optimistic per l'avegnir

Per l'avegnir na vesa Gastrosuisse però betg fitg nair. Ins spera che la muria da restaurants sa calmia; quai surtut tras ils indicaturs che vegnian puspè pli positivs: Ils turists che turnian ed ils consuments che fetschian puspè dapli expensas laschian sperar, tenor la Gastrosuisse.

RR novitads 12:00