La cuverta da naiv è en muntogna anc fitg auta. En blers lieus munta l'autezza da quella a dus, trais ubain quatter meters e dapli. En questa naiv è accumulada blera energia – uschè blera sco l'ultima giada avant 20 onns.
Ils producents da forza idraulica svizzers quintan perquai per quest onn cun blera electricitad d’aua ord ils auts. Tenor il quint da Swissgrid duessan ils producents da forza electrica pudair producir cun l'aua da la naiv 16 fin 17 uras terrawatt. Quai correspunda a l'energia che tut l'industria svizra dovra en in onn.
Naiv evapurescha er
Il pledader da la AXPO, Tobias Kistner, ha dentant relativà quai envers SRF: Las ovras electricas hajan bunas vistas, ha el ditg. Ins stoppia dentant spetgar e guardar quanta naiv che saja propi anc avant maun. Blera naiv evapureschia er e cuntanschia uschia gnanc ils lais da fermada, ha Kistner declerà vinavant. Plinavant dependia fitg da la plievgia durant la stad. Sumegliant tuni er tar auters concerns d’electricitad.
RR novitads 08:00