Siglir tar il cuntegn

Header

Navigaziun

Legenda: Guardar il video La perfuraziun dal tunnel da basa Ceneri – maletgs dal mument istoric. Durada 01:48 minutas.
Or da Telesguard dals 21.01.2016.
cuntegn

Svizra Mument istoric: Il tunnel da basa dal Ceneri è perfurà

Avant prest 10 onns han las lavurs da construcziun per il tunnel da basa dal Ceneri cumenzà. Oz è stada la perfuraziun.

Igl è in ulteriur punct culminant en l’entir project da la NEAT – la nova transversala da las alps: La perfuraziun dal tunnel dal Ceneri.

Curt avant las 12 la gievgia èsi stà uschè lunsch. Radund 700 meters avant il portal dal nord è il tunnel dal vest dal Ceneri vegnì perfurà. 1’500 aspectaturs han persequità avant ed en il tunnel a Camarino ina da las davosas perfuraziuns da la NEAT.

Ina detga explosiun, crappa che sgola enturn e lura miniers che giubileschan e s’embratschan. La finala eran mo anc dus meters grip enta pes.

Reducir il viadi

Las lavurs da construcziun dal tunnel che ha ina lunghezza da 15,4 kilometers han cumenzà 2007. I sa tracta, sco tar il tunnel da basa dal Gottard, da dus singuls tunnels cun mintgamai in binari. Il viadi da Locarno a Lugano sa reducescha da 55 minutas sin 22 minutas.

Il tunnel dal Ceneri è ina part da la NEAT. Cun ils tunnels da basa dal Ceneri e dal Gottard èn ins la finala var in’ura pli spert da Turitg a Milaun. Ma quai n’è betg la suletta raschun per il project da la NEAT. Cunquai ch’ins vegn da reducir las pendenzas massivamain cun quests dus tunnels èsi era pussaivel da transportar dapli rauba cun in sulet tren. E quai senza duvrar per la passascha dal Gottard u dal Ceneri ina segunda locomotiva.

Chavà davent da mez

Tant tar il portal dal sid a Vezia (vischinanza da Lugano) sco a Vigana/Camorino (vischinanza da Bellinzona) è il portal damanaivel d'abitadis. Perquai è vegnì reducì las lavurs sin il minimum. Vul dir sin las lingias da viafier e punts necessarias, che mainan da la lingia existenta tar il tunnel, e sin ils bajetgs d'infrastructura. Dals portals anora èn be vegnids chavads intgins tschint meters dal tunnel. Il tunnel per propi è vegnì chavà da Sigirino anora. In lieu en la vischnanca Monte Ceneri, ch’è prest sin l'autezza dal mez dal tunnel. Da quest lieu anora è vegnì chavà ina galaria da 2,3 km viaden en il culm. Da là e lura vegnì chavà il tunnel en direcziun sid e nord. Uschia è Sigirino il plazzal principal dal tunnel dal Ceneri.

Retards

Entras in recurs pervia da la surdada da las lavurs per la tecnica da tren l'onn 2013 ha i dà retard. L’AlpTransit Gotthard SA ha stuì scriver ora da nov las lavurs ed uschia ha quai dà in retard dad in onn. Ussa èsi quintà ch’ins possia avrir il tunnel la fin dal 2020. La stad passada ha i dentant anc dà in ulteriur recurs e quai da la vischnanca Camorino. Sin l’intschess da la vischnanca vegn construì il portal dal nord. En pli vegnan era fabritgads là il stabiliment per la tecnica da viafier ed in’antenna. Cunter la construcziun da quests stabiliments ha la vischnanca inoltrà in recurs. Sche l’AlpTransit Gotthard SA na vegn betg perina cun la vischnanca, pudess quest recurs chaschunar in ulteriur retard.

RR Actualitad 06:00/11:00/17:00

Tunnel dal Ceneri

  • Lunghezza: 15,4 km
  • Lunghezza da tut ils tunnels: 39.8 km
  • Portal nord: Vigana/Camorino
  • Portal sid: Vezia
  • Differenza d’autezza: 112,5 m
  • Material da stgavament: 7,9 milliuns tonnas
  • Custs: ca 2,2 milliardas
  • Avertura: probabel 2020