Siglir tar il cuntegn

Header

cuntegn

Svizra Multas da l'exteriur – pajar u betg pajar?

Igl è temps da vacanzas. Blers Svizzers sa mettan sin via cun l'auto en terras cunfinantas. Betg darar arriva mais suenter ina brev cun ina multa dal stadi da vacanzas – saja quai per parcar fauss u per ir memia spert.

Per l'Uffizi federal da polizia è la chaussa clera: En general èsi adina da pajar multas da l'exteriur. Sch'ins na paja betg pon ins per exempel vegnir inscrit en la glista d'investigaziun dal stadi correspundent. «I po vegnir tar in scumond d'entrar il stadi u tar fitg autas taxas d'admoniziun. I dat er terras che confisceschan l'auto tar il proxim segiurn u che smanatschan perfin cun arrest», declera la pledadra da medias Lulzana Musliu.

audio
Bunura: Multas da l'ester – pajar u betg?
ord Actualitad dals 03.08.2017.
laschar ir. Durada: 2 minutas 50 Secundas.

Far opposiziun en l' exteriur

«Stuair na ston ins betg exnum pajar la multa», manegia percunter l'advocat e consulent giuridic dal TCS, Thomas Castelberg. «Sch'ins vegn tractà dal tuttafatg nungiustifitgadamain na pajass jau forsa era ina giada betg il chasti.»

I dettia numnadamain er la pussaivladad da far opposiziun en l'exteriur. Damai che blera glieud haja ina segirada speziala (sco per exempel ina brev da protecziun) rendia quai tut tenor era.

Nagina pussaivladad d'incassar multa en Svizra

Pajar u betg pajar è ina dumonda. Sch'ina multa sa effectiv vegnir incassada u betg – gliez saja anc ina giada tut insatge auter. «In stadi europeic u era in auter na sa betg incassar in chasti en Svizra», uschia Castelberg. Sulettamain sch'ins visita puspè ina giada la terra da vacanzas, sappia il stadi prender las mesiras menziunadas da l'Uffizi federal da polizia. Ina excepziun è la Frantscha. «Ina cunvegna da polizia lubescha al stadi franzos da far valair lur multas er en Svizra ed er da laschar incassar talas da las autoritads svizras.»

RR actualitad 08:00

Artitgels legids il pli savens