Siglir tar il cuntegn
Inhalt

Svizra Mühleberg betg segirà avunda cunter auas grondas extraordinarias

L’ovra atomara da Mühleberg datiers da la citad da Berna n’è betg segira tar auas grondas extraordinarias, quai ha il Tribunal administrativ federal decis ed uschia approvà parzialmain dus plants da persunas privatas.

l'ovra atomara Mühleberg
Legenda: L'ovra atomara Mühleberg vegn messa giu definitivamain la fin da l'onn 2019. Keystone

La gestiunaria da l'ovra Mühleberg, la BKW, ensemen cun l'Inspecturat federal per la segirezza nucleara ENSI, stoppian uss cumprovar ch'il sistem da sfradament dal reactur saja garantì er tar inundaziuns extraordinarias che pon capitar mintga 10'000 onns.

Pumpas mobilas

Per garantir il sfradament tar in'inundaziun extraordinaria dovri in concept da segirtad cun plirs stgalims e mintga stgalim sto funcziunar per sa sez. En ils plants avevan las duas persunas privatas cunzunt crititgà il diever da pumpas mobilas tenor quest concept.

Il Tribunal administrativ federal ha decidì che las pumpas mobilas sajan bain lubidas. En il concept da segirtad na saja la rolla da questas pumpas però betg descritta bain avunda. Plinavant na sajan ils scenaris d'aua gronda betg vegnids verifitgads d'insatgi independent.

Reservuar d'aua

Il tribunal ha plinavant crititgà ch'i dovria en il concept da segirtad dapli infurmaziuns tar in reservuar d'aua che duai furnir aua per sfradentar sche l'aua da l'Aara na stat betg a disposiziun. Il reservuar tanschia numnadamain per in'ura e mesa e suenter na saja betg cler co il reactur vegnia sfradentà vinavant e co la collavuraziun cun il provediment d'aua guarda or. Ultra da quai vegnia il reservuar er anc duvrà per il provediment d'aua da baiver.

Standard europeic

Tenor l'Inspecturat federal per la segirezza nucleara ENSI fa valair che las mesiras da segirtad correspundian al standard europeic. L'ENSI e la BKW vulan uss analisar la sentenzia e ponderar sch'els vulan far recurs al Tribunal federal.

RR novitads 11:00