Siglir tar il cuntegn
Inhalt

Svizra Motiv per l'attatga a Schaffusa anc betg enconuschent

Durant ina conferenza da pressa han la polizia e la procura publica infurmà davart l'arrestaziun da l'attatgader. El saja sa depurtà en urden e saja stà cooperativ. Davart il motiv per l'attatga na sa la polizia anc dir nagut damai che l'um n'è anc betg vegnì interrogà da la polizia.

Purtret da Ravi Landolt e Peter Sticher.
Legenda: Peter Sticher, il procuratur public e Ravi Landolt il schef da segirezza han gì da dar pled e fatg durant la conferenza. Keystone

Ier saira a las 18:50 ha pudì vegnir arrestà l'attatgader da Schaffusa a Thalwil. Grazia ad in'infurmaziun or da la populaziun ha la polizia chattà l'um. El haja gì dus balesters chargiads cun el en in satg da plastic. Plinavant er dus fists cun pizs. La resgia a motor che l'um haja duvrà tar l'attatga en ina filiala da la CSS n'ha la polizia anc betg chattà.

Durant l'arrestaziun saja l'um stà cooperativ e n'haja betg sa dustà. La polizia è persvasa ch'i saja stà la dretga decisiun da mussar uschè svelt ils purtrets da l'attatgader e da scriver ora la tschertga per el internaziunalmain. Uschia saja l'um vegnì chattà svelt, grazia a l'agid da la populaziun.

Co l'um ha pudì mitschar da la citad veglia a Schaffusa e vegnir a Thalwil, ch'è 60 kilometers lunsch davent n'è anc betg cler. Ses auto era vegnì chattà gia glindesdi en in guaud d'ina vischnanca vischina da Schaffusa. Il numer d'auto grischun n'ha l'auto betg gì si. Quellas aveva l'uffizi da traffic gì tratg en.

Il delinquent vegn interrogà oz suentermezdi

Il mument sa chattia il delinquent en arrest d'inquisiziun. I valia er qua la presumziun d'innocenza. L'um vegnia examinà corporalmain d'in medi giudizial per constattar sche l'um haja sez era survegnì blessuras. Il motiv per l'attatga n'è er anc adina betg cler, damai che l'um n'è anc betg vegnì interrogà. Quai fa la polizia oz suentermezdi.

In blessà è anc en l'ospital

Davart las blessuras exactas dals blessads n'ha la polizia betg pudì far indicaziuns. Els han sulet menziunà ch'ina persuna saja vegnida operada e sa chattia anc en l'ospital. Ils auters hajan pudì turnar a chasa.

RR novitads 11:00