Las decisiuns :
- Na a moratori d'asil: Ils parlamentaris na vulan savair nagut dad in stop da prender si novs fugitivs sco quai che la PPS pretenda.
- Procedura d'asil accelerada: Cun 99 cunter 53 vuschs e 12 abstenziuns ha il Cussegl naziunal approvà la refurma.
- Gea a centers spezials: Requirents d'asil renitents duain vegnir mess en centers spezials.
- Naginas dumondas d'asil sin ambassadas: Requirents d'asil na duain betg pudair inoltrar ina dumonda d'asil sin las ambassadas a l'exteriur.
- Entrà en la debatta: Cun 135 cunter 52 vuschs ha il Cussegl naziunal decidì d'entrar en la debatta e da discutar ils detagls. Ussa cumenza la debatta da detagl.
Cussegl naziunal refusa moratori d'asil
La PPS aveva argumentà che la Svizra prendia si surproporziunalmain blers fugitivs. Plinavant saja pussaivel ch'il pajais vegnia tuttenina confruntà cun in grond dumber da fugitivs. Dad in stop d'asil na vulan las ulteriuras partidas dentant savair nagut. Cun per part ferma critica è questa intervenziun vegnida refusada en ina debatta speziala.
Procedura d'asil duai vegnir accelerada
Ordavant aveva il Cussegl naziunal decis d’accelerar la procedura d’asil en Svizra. Questa finamira da la refurma d’asil era gia fruntada sin grond consentiment en il Cussegl dals chantuns. Cunter ina tala procedura accelerada ha sulettamain la PPS fatg resistenza.
La fracziun da la PPS aveva proponì da betg entrar en la debatta. Sco alternativa aveva ella proponì da trametter enavos la fatschenta al Cussegl federal cun l'incumbensa d'applitgar la clausula da stadi d'urgenza ch'è previsa en la lescha d'asil. Lura duai la regenza svizra suttametter novas propostas. Il Cussegl federal refusa quai. Applitgar questa pussaivladad saja la «ultima ratio».
Centers spezials per requirents renitents
Il Cussegl naziunal vul che requirents d'asil renitents vegnan plazzads en centers spezials. Requirents d’asil renitens duain en l’avegnir vegnir mess sut tetg en centers spezials. Quai aveva gia il Cussegl dals chantun decis. La chombra gronda ha però fatg tschertas adattaziuns. Uschia duain sulet persunas che pericliteschian considerablamain la segirezza publica u disturbian il manaschi en in center vegnir en in tal center. Nua ch'in tal center duai vegnir stgaffì, n'è il mument anc betg cler.
Naginas dumondas d'asil sin ambassadas
Fugitivs na duain betg pudair inoltrar lur dumonda d'asil sin ambassadas svizras a l'exteriur. Il Cussegl naziunal ha refusà tar la refurma d'asil las dumondas per ina reintroducziun. Ils Verds e la PS avevan argumentà lur pretensiun cun il cumbat cunter organisaziuns da cuntrabandists.
Betg agir sulet
Blers parlamentaris han mussà chapientscha per la dumonda dals Verds e la PS. Ord vista d'ina maioritad vegniss l'asil sin ambassadas però be en dumonda sche era l'Europa schess gea. Agiss la Svizra suletta vegnissan las ambassadas inundadas, averteschan ils adversaris. Er il Cussegl federal fiss be pront d'examinar la dumonda sch'i vegniss prendì las mesiras correspundentas sin plaun da l'UE.
RR novitads 06:00