Siglir tar il cuntegn
Inhalt

Svizra Monika Fasnacht di adia

In'èra va a fin. Suenter 18 onns moderescha Monika Fasnacht per la davosa giada il «Samschtig-Jass». Nagin auter ha moderà uschè bleras giadas la pli veglia emissiun da la Televisiun Svizra.

Monika Fasnacht di adia.
Legenda: Monika Fasnacht di adia. SRF

Nagin ha moderà pli ditg la pli veglia emissiun da SRF e nagin uschè bleras ediziuns dal «Samschtig-Jass». Suenter 18 onns e suenter che Monika Fasnacht ha gì quasi mintga prominent da la Svizra ord mintga sparta a la maisa da jass pren ella cumià.

I dettia ina dernièra fitg emoziunala era cun bleras surpraisas ed a la fin segir era cun in larmin. Sco giavisch musical per sia dernièra ha la regina dal jass Monika Fasnacht giavischà il retg da la musica populara, Carlo Brunner.

«Roger Federer avess jau anc gì gugent»

Monika Fasnacht en l'emissiun dal prim d'avrigl.
Legenda: Monika Fasnacht en l'emissiun dal prim d'avrigl. SRF

Mal stat Monika Fasnacht ch'i è en tut quels onns betg gartegià dad era carmalar Roger Federer a la maisa da jass. Quel haja dà in chanaster. Nagin chanaster per adina. Cura che sia carriera da tennis saja a fin vegni el gugent. Uschia ch'insatgi auter vegn ad avair questa onur a la maisa dal «Samschtig-Jass».

Monika Fasnacht vegn a restar tar la Televisiun Svizra. Quai en l'emissiun «Tiergeschichten - Unterwegs mit Monika und Filou».

Ils davos «Samschtig-Jass» è ils 01-07-2017 a las 18.45 sin SRF1.

RR actualitad 08:00