Siglir tar il cuntegn

Header

cuntegn

Models da lavur flexibels L'Islanda sco piuniera

Models innovativs da lavurar datti entant blers – ed adina daplirs. Cumparegliar quels è dentant difficil, cunquai che las cundiziuns èn differentas.

In model per flexibilisar il temp da lavur è l'emna da quatter dis. Adina dapli pajais han interess d'introducir in tal model.

audio
Models da lavur per futur: Emna da 4 dis – exempel Islanda
ord Actualitad dals 03.05.2022.
laschar ir. Durada: 3 minutas 44 Secundas.

Studi extendì en Islanda

Gia l'onn 2015 ha l'Islanda cumenzà cun in studi scientific per reducir il temp da lavur: 2'500 persunas da passa 100 instituziuns publicas èn sa participadas al studi sur quatter onns. Il resultats han persvadì, cunquai ch'il pajais ha nudà pli paucs burnouts, dapli cuntentietscha tar il persunal ed ina megliera prestaziun. Temas che la productivitad sa sbassa n'èn betg sa verifitgadas cun tschintg uras pli pauca lavur mintg'emna. Anzi, collavuraturas e collavuraturs fetschien pli curtas pausas, sesidas pli effizientas e dovrian dapli mieds digitals, uschia il facit da l'organisaziun Alda (Association for Democracy and Sustainability).

E quest experiment ha purtà fritg: 86% dal persunal dal pajais lavura gia u ha la pussaivladad da lavurar reducì. Bain chapi: La lavur da l'emna è vegnida reducida da 40 sin 35 uras tar la medema paja.

Foto da la cuntrada da l'Islanda
Legenda: Dapli temp liber – in giavisch da blers emploiads ed in pussaivel recept per patruns per recrutar persunal? Keystone

Plans en la Belgia, Irlanda e Spagna

Era en la Belgia duain emploiadas ed emploiads pudair lavurar en l'avegnir durant quatter enstagl da tschintg dis. Persuenter vegn lavurà pli ditg mintga di. Il priminister Alexander De Croo ha empermess ina refurma da las leschas da lavur. Tge consequenzas che quai ha sin la paja n'è anc betg sclerì.

Quest schaner ha era l'Irlanda cumenzà ina fasa da test da sis mais per introducir l'emna da quatter dis. La regenza metta a disposiziun 150'000 euros e spera uschia surtut da meglierar las premissas per cumbinar famiglia e professiun, da reducir il traffic da pendular e las emissiuns da CO2.

Perfin 50 milliuns euros investescha la regenza da la Spagna en in test naziunal. Ils custs che sa resultan tar las 200 interpresas surpiglia il stadi (100% l'emprim onn, 50% il segund onn e 33% il terz). Il temp da lavur duai vegnir reducì sin 32 uras ad emna – tar la medema paja.

Il Giapun ha decis l'onn passà da promover in'emna da quatter dis voluntaria. La raschun è che persunal qualifitgà manca e che la regenza giapunaisa è sfurzada da tschertgar novs models.

Era sch'ils pajais da la Scandinavia vala sco piuniers en differents models da famiglia: La Svezia ha bain testà il model da quatter dis l'emna – n'ha dentant betg introducì quel en l'entir pajais. Il project da l'onn 2015 ha zuar mussà ch'il persunal lavura pli effizient ed è pli cuntent. Dentant il mantegnair las pajas ed engaschar dapli persunal haja manà a gronds custs.

E la Svizra?

Malgrà discussiuns enturn models da lavur flexibels, n'ha anc nagin concern grond introducì in'emna da quatter dis. Quai mussa ina retschertga da Swissinfo da quest favrer. L'alternativa è en Svizra plistost il lavurar parzial (p.ex. 80%), lura dentant cun reducir pensum e paja. Models da lavur flexibels porschan plitost interpresas pli pitschnas u start-ups en Svizra.

Igl è dentant da dir: Sch'ins definescha «models da lavur flexibels» plitost a moda generala, alura s'audan era in temp da lavur flexibel, temp da lavur annual etc vitiers. Era la dumonda dal plaz da lavur è en discussiun, surtut dapi ch'adina dapli persunas fan homeoffice ubain nizeggian spazis da co-working.

RTR actualitad 08:00

Artitgels legids il pli savens