Mir da fermada dal Grimsel na dastga betg vegnir auzà

Il concern d'energia da la Part sura bernaisa KWO na dastga betg auzar ils dus mirs da fermada sin il pass dal Grimsel. Quai ha decidì la Dretgira administrativa da Berna. Ella metta uschia la proteziun da palì sur ils interess dals producents d'energia.

lai da fermada sin il Grimsel, davant in mast d'auta tensiun

Legenda da maletgs: In dals dus mirs dal lai da fermada sin il pass dal Grimsel. Keystone

La dretgira ha tractà ils recurs da las organisaziuns d'ambient cunter l'auzament dals mirs dals lais da Grimsel. Tenor ella ha il Cussegl federal schlargià a moda nunlubida il perimeter dal territori da protecziun da palì.

Curregì decisiun dal Cussegl federal

Il 2004 ha il Cussegl federal auzà il cunfin da la protecziun sin 27 meters sur la riva dal lai. Quai saja stà ina decisiun politica cun la suletta finamira che la KWO possia engrondir il lai, uschia ils derschaders bernais.

Tenor la Dretgira administrativa da Berna na lubeschia la constituziun federala sco era la lescha federala per la protecziun da la natira betg quai, la regenza svizra haja violà ses spazi da giudicat. In inspecziun en il lieu haja mussà exact ch'il territori da palì tanscha fin a la riva dal lai.

Il 2012 ha il Cussegl grond da Berna lubì il settember al concern KWO d'adattar e cumplettar la concessiun generala ed ha uschia lubì d'auzar ils dus mirs da fermada per 23 meters. 9 organisaziuns d'ambient, tranter auter la Fundaziun Greina, il WWF Svizra e la Pro Natura, han inoltrà il mars 2013 in recurs cunter questa decisiun. Ellas han pretendì che la dretgira annullescha la decisiun dal parlament chantunal.

Project da 300 milliuns francs

Cun auzar ils dus mirs vul la Kraftwerke Oberhasli SA (KWO) quasi dublegiar la capacitad dals lais da fermada sin il Grimsel. Uschia vul il concern reparter meglier la producziun d'electricitad sin l'entir onn.

La decisiun da la dretgira è stada clera cun 5:0 vuschs. La decisiun po vegnir tratg vinavant.

RR novitads 14:00