Siglir tar il cuntegn

Svizra Migros cun damain gudogn il 2017

L'onn passà ha il pli grond detaglist svizzer fatg in gudogn da 503 milliuns francs. Quai è in minus da 24% cumpareglià cun l'onn precedent.

Filiala da la Migros.
Legenda: Il gudogn da la Migros è sa reducì per 24%. Keystone
  • Il gudogn da la gruppa da Migros è sa reducì per 24% sin 503 milliuns francs l'onn passà.
  • I sa tracta gia dal terz onn en seria che la Migros fa damain gudogn.
  • Sco raschun per il resultat numna il detaglist il squitsch da pretsch pli rigurus.

La gruppa da la Migros ha fatg era l’onn passà damain gudogn. Quel munta a 503 milliuns francs ed è bunamain ¼ pli pitschen che l’onn avant. Quai ha communitgà la Migros. Malgrà il gudogn pli pitschen saja la Migros sauna sco in pesch, ha ditg il nov president da la Migros, Fabrice Zumbrunnen.

La svieuta da la gruppa è percunter s'augmentada sin 28,1 milliardas francs. Quai è in augment da 1,2% cumpareglià cun l'onn 2016, sco il detaglist aveva gia communitgà il schaner.

Commerzi online e novs clients

En il commerzi en detagl resta la Migros vinavant il numer 1 en Svizra. Quai cun ina svieuta da 23,5 milliardas francs. La gruppa da la Migros veglia uss orientar sia purschida anc pli fitg sin ils basegns da la clientella. Quai ha ditg Zumbrunnen. En il focus sajan l'engrondiment dal commerzi online ed ils pretschs. Uschia vul la Migros attrair novs clients e far frunt al gudogn che sa reduceschia gia dapi il 2015.

RR novitads 12:00