Siglir tar il cuntegn

Header

cuntegn

Svizra «Migraziun» ed «Europa» èn ils quitads principals

Tenor la retschertga da gfs.bern per la SSR è il quità principal dals dumandads tut ils temas enturn la migraziun. Suandà da las dumondas enturn las relaziuns cun l'Europa e l'ambient. Las schliaziuns haja la PPS per la migraziun e per l'Europa plitost la PLD.

La retschertga

Avrir la box Serrar la box

Per il barometer d'elecziuns da la SRG SSR ha l'institut gfs.bern interrogà 2'017 persunas cun dretg da votar en Svizra. Quai tranter ils 11 ed ils 19 da mars 2015. Il sbagl da prova è tar +/- 2,2%.

Ils quitads centrals èn cun distanza la migraziun (33%) e l'Europa (12%). Quests temas èn s'accentuads dapi l'ultim barometer d'elecziuns da l'october 2014. Quests temas èn era creschids il pli fitg: omadus per radund 4 puncts.

Cun distanza clera suonda in bloc cun las tematicas da l'ambient, da la dischoccupaziun ed enturn la sanadad publica. Dumondas da famiglia e davart l'energia - ch'eran en il center da votaziuns l'ultim temp - suondan pli tard.

Regressivs en cumparegliaziun cun l'october èn però las tematicas enturn la dischoccupaziun e las cassas da malsauns.

Ils profils da las partidas tenor ils dumandads

grafica en pitgas che mussa ils profils da las partidas
Legenda: Barometer d'elecziuns SSR/gfs.bern 2015, ils 11.03 - 19.03.2015 (n=1'104) RTR

PPS: Vegn vesida cleramain sco partida cun cumpetenza da coc en dumondas da migraziun. Era cumpetenta vegn ella resentida tar las dumondas davart l'Europa e la dischoccupaziun. Damain persuenter en dumondas da la sanadad publica e da l'ambient.

PLD: La pli auta valur da cumpetenza ha la PLD en dumondas da l'Europa; quai ensemen cun la PS. Era en tschels temas centrals è la PLD preschenta.

PCD: Il pli tgunsch vegn attestà cumpetenza a la PCD quai che pertutga il sectur da la sanadad publica. Preschenta è la PCD però era tar tschels temas; per part però mo marginal.

PBD: La PBD n'ha nagin profil cler pertutgant las cumpetenzas per schliar in problem. Limità cumpara la PBD tar las tematicas migraziun ed Europa. Tar tschels 3 dals 5 temas prioritars na cumpara ella betg.

PVL: Era a la PVL vegn attestà paucas cumpetenzas per schliar ils problems. Limità en dumondas per l'ambient, e mo a l'ur tar las dumondas da l'Europa.

PES: A la PES vegn attribuì clera cumpetenza en las dumondas da l'ambient e davart l'energia. Ultra da quai limitadamain era tar dumondas da la migraziun, davart l'Europa e la dischoccupaziun.

PS: La cumpetenza da coc da la PS vegn vesì tar la dischoccupaziun - e limitadamain tar la sanadad publica. Ella cumpara però dappertut cun potenzial da schliar - ed è uschia la partida cun il profil il pli lartg.

RR novitads 17:00

Artitgels legids il pli savens